Ádilet mınıstri Statı isin qoldan sozý týraly: Sáıkes aqparat bar, biraq ol qyzmettik qupııa

<p>Ádilet mınıstri Azamat Esqaraev Statı isiniń Qazaqstan tarapynan qoldan sozylyp otyrǵany týraly paıymǵa pikir bildirdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Keıbir sarapshylar Statı isin Qazaqstan tarapynan júrgizip otyrǵan top onyń neǵurlym uzaq sozylýyna múddeli degen pikir aıtyp júr. Óıtkeni ol jerden advokattarǵa aqsha tólenip jatyr, bıýdjetten aqsha bólinip otyr. ıAǵnı, Statı isi neǵurlym kóbirek júrse, is júrgizýshi top soǵurlym paıdaǵa keneledi degen paıym bar. Tipti osy múddeli toptyń qatarynda burynǵy Ádilet mınıstri Marat Beketaevtyń da aty atalady. Siz mınıstr bolyp kelgennen beri Statı isin osy turǵydan zerdeleńizder me? Іsti qoldan sozý deregin kezdestirmedińiz be?», – dep surady BAQ ókili.

Mınıstr áýeli óziniń isti sozýǵa eshqandaı múddeli emes ekenin aıtty.

«Árıne, meniń aldymda istegen adamdardyń jumysyna baǵa bere almaımyn. Al biraq osy másele boıynsha ózimniń ishki ustanymymdy aıtaıyn. Bul máseleni ári qaraı sozbalaýǵa eshqandaı yntamyz da, nıetimiz de joq. Elge de bul suraqtyń qajeti joq. Sondyqtan eger bizdiń áriptesterimiz halyqaralyq quqyqtyq deńgeıde kómek kórsetip, iske asyryp jatqan sharalar oń nátıjesin berip jatsa, bul máseleni tez sheshýge daıynbyz», – dedi mınıstr.

Azamat Esqaraev Statı isiniń uzaqqa sozylýyna baılanysty keıbir derekter qupııaǵa jatynyn málim etti.

«Іsti qoldan sozý derekteri týraly sizge bylaı aıtaıyn. Sáıkes aqparattar bizde bar. Biraq men ol aqparatty sizge aıta almaımyn. Óıtkeni jumys babyna baılanysty», – dedi Ádilet mınıstri.