Ádilhan Erjanovtyń jańa fılmi halyqaralyq Venetsııa kınofestıvaline qatysady

NUR-SULTAN. QazAqparat - Ádilhan Erjanovtyń nýar janrynda túsirilgen «Golıaf» atty jańa kórkem fılmi 79-shy Halyqaralyq Venetsııa kınofestıvaliniń Orizzonti Extra («Jańa kókjıekter») baǵdarlamasyna qatysady. Bul týraly Venetsııa bıennale kórkemdik jetekshisi Alberto Barbera onlaın formatta ótken baspasóz otyrysynda málim etti, dep habarlaıdy QazAqparat tilshisi.

«Golıaf» fılminde bılik pen baǵyný tabıǵaty zertteledi. Kek alý ıdeıasy (bir jaǵynan múmkin bolmasa da) jáne úlken tulǵalar men kishkentaı adamdardyń arasyndaǵy qaqtyǵystar týraly sıýjet burynnan beri oıda bolatyn. Eki jyl ishinde stsenarııdi birneshe ret ózgerte otyryp, osy máselelerdi kóterýge tyrystym. Fılmde art pen janr arasynda ózindik shegi bar, sondyqtan muny keıbireýler túsinbeýi múmkin, alaıda joǵary baǵalaıtyndar bolady degen senim bar», - deıdi fılmniń rejısseri ári stsenarıı avtory Ádilhan Erjanov.

«Qazaqfılm» kınostýdııasynyń qatysýymen, qazaqstandyq Short brothers jáne Changepoint kınokompanııalary, sondaı-aq reseılik All Media (a START Company) men «Forest-Fılm» kompanııalary birlese túsirgen kınotýyndynyń oqıǵasy Qaratas aýylynda órbıdi. Óziniń qataldyǵymen jáne albyrttyǵymen belgili Bólegen esimdi jigit aýyl turǵyndaryn úreıde ustaıdy, olardy baspanamen, jumyspen qamtamasyz etedi. Oǵan qarsy shyqqan jandardy aıaýsyz jaýapqa tartady. Qaratas aýylyndaǵy qylmys týraly polıtsııaǵa jetkizbek bolǵan Arzýdyń áıeli búkil otbasyn qaterge tigedi.

Fılmniń túsirý jumystary byltyr jaz aıynda Almaty tóńireginde ótti. Basty rólderdi qazaqstandyq belgili akterler: Berik Aıtjanov, Danııar Alshynov, Almıra Tursyn jáne Erken Gýbashev somdady. Sondaı-aq, fılmge reseılik akterler Dmıtrıı Chebotarev jáne Aleksandra Revenko tústi.

Atalǵan kınovestıval 31 tamyz ben 10 qyrkúıek aralyǵynda Lıdo aralynda ótedi. Festıval uıymdastyrýshylary bıyl bul baıqaýǵa jeti fılm qatysatynyn habarlady. Orizzonti Extra baǵdarlamasy kıno álimine jańalyq alyp kelgen fılmderdi kórsetip qana qoımaı, álemge jańa rejısserlerdi tanystyrady. Bul baǵdarlama sheńberinde túrli janrda jáne ár túrli formatta túsirilgen fılmderdiń ishinen úzdik týyndyny kórermenderden quralǵan qazylar alqasy anyqtaıdy.

Aıta ketsek, Ádilhan Erjanovtyń «Sary mysyq» atty fılmi 77-shi Venetsııa kınofestıvaliniń «Kókjıekter» baǵdarlamasyna qatysqan bolatyn.

Sondaı-aq, Ádilhan Erjanovtyń fılmderi Kann, Lokarno, Rotterdam, Brıýg, Stokgolm, Pýsan syndy bedeldi festıvalderde kórsetilip, kóptegen júldelerge ıe bolǵan. Ol 2019 jyly «Qap-qara adam» fılmi úshin Asia Pacific Screen Awards (Azııalyq «Oskar» atanǵan) júldesin alǵan alǵashqy qazaqstandyq rejısser. Halyqaralyq Kann kınofestıvali sheńberinde Erjanovtyń eki birdeı fılmi – «Erekshe kózqaras» baǵdarlamasynda «Álemniń erke enjarlyǵy» («Laskovoe bezrazlıchıe mıra») jáne «Úkili Kamshat» («Spetsıalnyı pokaz») kınotýyndylary kórsetilgen

bolatyn.

Foto: kazakhfilmstudios.kz