Ádiletti qoǵamda eńbek adamy eń birinshi orynda turýy kerek – Memleket basshysy
«Jastarymyz úsh nárseniń aıryqsha mańyzdy ekenin túsinýi kerek. Bul – tereń bilim, eńbekqorlyq jáne otanshyldyq qasıet. Biz quryp jatqan ádiletti qoǵamda eńbek adamy eń birinshi orynda turýy kerek degen uǵymdy jastarymyzǵa túsindirý qajet. Sebebi, otanshyldyq degenimiz, eń aldymen, iskerlik, eńbekqorlyq.
Qur sózden eshteńe shyqpaıdy. Azamattarymyz aldymen otbasyn asyrap, balalaryna qamqor bolýy kerek. Olarǵa adal eńbegimen, alǵyrlyǵymen nápaqasyn taýyp berýi qajet.
Biz shyn máninde eńbekqor ult bolýǵa umtylýymyz kerek. Álemde eńbeksúıgish halyqtar az emes. Bul qasıet, tipti, olardyń bolmysyna sińip ketken. Osy asyl qasıet bizdiń jurtymyzǵa da tán bolýy kerek. Óıtkeni, halqymyzdyń qarym-qabileti eshkimnen kem emes. Ultymyzǵa qatysty aıtylatyn keıbir jaǵymsyz sıpattamalardan biz múldem arylýymyz qajet», - dedi Qasym-Jomart Toqaev.
Prezıdent eńbekqorlyq – qazirgi zamanda bizge asa qajet qundylyq dep atap ótip, osy qaǵıdany keńinen dáripteýimiz kerektigin aıtty. Muny Semeı tórinde turyp aıtýynyń da ózindik sebebi baryn jetkizdi.
«Óıtkeni, bul – árdaıym jas urpaqty jaqsylyqqa, jańashyldyqqa jetelegen jer. Meniń Úndeýim elimizdegi árbir jastyń júregine jetedi dep senemin. Shyn máninde, qazir bilim men ǵylym saltanat qurǵan zaman. Muny dáleldeýdiń esh qajeti joq. Álemdik ekonomıkada joǵary tehnologııalyq ónimderdi jasap shyǵaratyn kompanııalar alǵa shyqty. Bul – ǵylym keleshektiń bet-beınesin anyqtaıdy degen sóz. Tyń ıdeıa men ozyq oı kez kelgen salany órkendetedi. Óskeleń urpaq bilimge, ǵylymǵa qushtar bolýy kerek. Osyny jan-jaqty dáripteýge memleket qana emes, búkil qoǵam jáne árbir azamat atsalysýǵa tıis. Órkenıetti memleketti tek bilimdi azamattar ǵana qalyptastyra alady. Jýyrda Nıý-Iorkke saparymda AQSh-ta jumys istep júrgen jastarmen kezdestim. Olar bilim alýǵa degen ynta-jigeri men eńbekqorlyǵynyń arqasynda álemniń ár túkpirinde tabysqa jetip júr. Mine, osyndaı jastardy úlgi tutý qajet», - dedi Memleket basshysy.