Ádiletti Qazaqstannyń múddesi úshin kúresip jatyrmyz – Baıtaq partııasy

ASTANA. QazAqparat – Elordada elimizde tirkelgen partııalardyń ókilderi arasynda pikirsaıys ótti. Osy oraıda «Baıtaq» jasyldar partııasynan qatysqan Aınur Sábıtova saılaýda jeńiske jetken jaǵdaıda partııanyń josparlary týraly aıtty, dep habarlaıdy QazAqparat tilshisi.

«Biz «Baıtaq» jasyldar partııasyn qurdyq. Óıtkeni biz ýádelerdi estýden jáne iri ónerkásiptik kompanııalardyń elimizdiń jer qoınaýy esebinen qalaı baıyp jatqanyn kórýden sharshadyq. Ónerkásipter aýany lastap jatyr. Balalarymyz osy las aýamen tynys alady, sondaı-aq mundaı jaǵdaıdan ata-analarymyzdyń da densaýlyǵy nasharlaıdy», - dedi Aınur Sábıtova «KTK» arnasynda ótken partııa ókilderiniń arasyndaǵy pikirsaıysta.

Osy oraıda ol mundaı zalal úshin, onkologııalyq aýrýlar men basqa da dertter úshin eshkim ótemaqy almaı jatqanyn basa aıtty.

A. Sábıtovanyń aıtýynsha, «Baıtaq» partııasynyń tuǵyrnamasynda densaýlyǵy myqty, aqyldy, bilimdi, sybaılas jemqorlyqqa qarsy sanasy qalyptasqan jastardyń múmkindigimen ekonomıkany kóterip, memlekettiń qýatyn arttyrýǵa erekshe mán berilip otyr.

Sonymen qatar ol salaýatty ómir salty elimizdiń ekonomıkasyna da ońtaıly yqpal etetinin jetkizdi.

«Elimizge taza energııa men taza ónerkásip qajet ekenin aıtqymyz keledi. Biz bılik úshin emes, ádiletti Qazaqstannyń múddesi úshin kúresip jatyrmyz. Biz kún saıyn azamattarymyzdyń, qarapaıym halyqtyń quqyǵyn qorǵap kelemiz. Eger biz Parlamentke kirsek, onda «Baıtaq» partııasy tıisti aýdıt júrgizip, ónerkásiptik keshenniń ekologııaǵa keltirgen zııanyna qatysty táýelsiz zertteýler júrgizemiz. Biz bul baǵytta tıisti áreketter jasap jatyrmyz jáne josparymyzdy júzege asyramaqpyz», - dedi A.Sábıtova.

Aıta keteıik, búgingi pikirsaıysqa «Amanat» partııasynan Aıdos Sarym, «Aýyl» halyqtyq demokratııalyq partııasynan Jıgýlı Daırabaev, «Respublica» partııasynan Dınara Shúkijanova, Qazaqstan halyq partııasynan Ermuhamet Ertisbaev, «Baıtaq» jasyldar partııasynan Aınur Sábıtova, «Aq jol» demokratııalyq partııasynan Dánııa Espaeva, al Jalpyulttyq sotsıal-demokratııalyq partııasynan Ashat Rahymjanov qatysyp jatyr.