Ádilet mınıstrliginde sybaılas jemqorlyq táýekelderine taldaý jasaldy

ASTANA. QazAqparat - Ádilet mınıstrligi júıesinde sybaılas jemqorlyq úshin jaýapkershilikke tartylǵandar eki esege artty. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov málim etti, dep habarlaıdy QazAqparat.

«Ulttyq bıýro derekterine súıensek, 2018 jyly Ádilet mınıstrligi júıesinde qylmystyq jaýapkershilikke tartylǵandar eki esege jýyq óskeni baıqaldy. Eger de 2017 jyly 10 adam jaýapqa tartylsa, 2018 jyly 19 adamǵa qatysty shara qoldanyldy. Bizdińshe, bul jaǵdaı aıtarlyqtaı nazar aýdaratyn másele bolyp otyr. Osy oraıda aldyn alý sharalaryna ekpin qoıǵan jón», - dedi Oljas Bektenov Ádilet mınıstrligi qyzmetinde jemqorlyq táýekelderine jasalǵan taldaýdyń qorytyndysyna arnalǵan keńes barysynda.

Atalǵan agenttiktiń sybaılas jemqorlyq qaterlerdi syrtqy taldaý basqarmasy basshysy Áıgerim Pármenovanyń aıtýynsha, taldaý sharalary byltyr qazan aıynda ótkizilgen. Onyń barysynda ádilet departamentterine qatysty tekserý formasyndaǵy baqylaý sharalary mınıstrlik tarapynan júıeli negizde júrgizilmeıtini anyqtaldy. Al taqyryptyq tekserýler birli-jarym sıpatqa ıe.

Óz kezeginde Ádilet mınıstrliginiń jaýapty hatshysy Danııar Aıtmuhametov bul taldaý qorytyndysy boıynsha mınıstrlik jemqorlyq alǵysharttarynyń sebebi men jaǵdaıyn joıý boıynsha sharalar josparyn ázirlegenin atap ótti.