Ádilet mınıstrligi jeke málimetterdiń syrtqa jarııalanýyn joqqa shyǵardy

NUR-SULTAN. QazAqparat – Ádilet mınıstri Marat Beketaev jeke tulǵalar týraly málimetterdiń syrtqa jarııalanyp ketkenin joqqa shyǵardy, dep habarlaıdy QazAqparat tilshisi.

«Búgin Kıbershabýyldardy taldaý jáne zertteý ortalyǵy «Jeke tulǵalardyń ıntegratsııalanǵan málimetteriniń memlekettik bazasyndaǵy» 2020 jyldyń basynan bergi qordalanyp, jınalyp qalǵan 24 500 aýdıojazba men telefon áńgimeleri, azamattardyń jeke málimetteri áleýmettik jelilerde qoljetimdi bolyp qalǵanyn jarııa etti. Buǵan qatysty ne aıtar edińiz?» - degen suraq qoıyldy Marat Beketaevqa OKQ-da ótken baspasóz máslıhatynda.

Bul suraqqa jaýap bergen mınıstr keıbir BAQ-tan osyndaı aqparatty kórgenin rastady.

«BAQ-taǵy maqalalardan keıin málimetter bazasynyń bárin qarap shyqtyq. Jeke tulǵalar týraly memlekettik málimetter bazasy týraly aıtar bolsaq, eshqandaı aqparat syrtqa shyǵyp ketken joq. «1430kz» degen júıe jeke tulǵalar týraly memlekettik málimetter bazasymen ıntegratsııalanbaǵan. Bul bazadan málimetterdiń syrtqa shyǵyp ketkeni týraly áńgimeler esh negizsiz», - dedi ol.

Sonymen qatar mınıstr óz sózinde memlekettik málimetter bazasy qalaı qorǵalatynyn aıtyp berdi.

«Bul júıeler memlekettik organdardyń serverlik ortalyǵyna ornalastyrylyp, aqparattyq qaýipsizdik jedel ortalyǵyna qosylǵan. Jedel ortalyq aqparattyq júıelerge táýlik boıy monıtorıng jasaıdy. Jetkilikti deńgeıde bul bazalar qorǵalǵan», - dedi ol.