Ádilet mınıstrligi Ulttyq qor aktıvteriniń buǵattalýy týraly málimetti joqqa shyǵardy
«2018 jylǵy 19 maýsymda Anglııanyń apellıatsııalyq soty BNYM men QR Ulttyq banki arasynda jasalǵan kastodıandyq kelisim erejeleri boıynsha Bank of New York Mellon (BNYM) mindettemelerine qatysty iste sheshim shyǵardy. Anglııanyń apellıatsııalyq soty belgııalyq sot sheshiminiń negizinde BNYM-nyń Anglııa aýmaǵyndaǵy aktıvterdi buǵattaý quqyǵy týraly oqshaýlandyrylǵan zańdy máseleni ǵana qarady. Bul rette Ulttyq qordyń 21,5 mlrd AQSh dollaryna jýyq somadaǵy aktıvteri Brıýsseldegi birinshi satydaǵy sottyń 2018 jylǵy 25 mamyrdaǵy sheshimi boıynsha bosatylǵan bolatyn. Barlyq qarjy basqa kastodıan-bankterdegi shottarǵa aýdaryldy», - dep atap ótilgen Ádilet mınıstrliginiń resmı habarlamasynda.
Atap ótilgendeı, Qazaqstan Respýblıkasy men Ulttyq bank 530 mln AQSh dollary kólemindegi qarajatty bosatý úshin aǵymdaǵy jylǵy 28 mamyrda Anglııanyń kommertsııalyq sotynda jańa protseske bastama jasady.
«Atalǵan sot protsesteri Statıdiń tórelik sheshim boıynsha tólemderiniń máselesin qozǵamaıdy, tek qana qamtamasyz etý sharalaryna - aktıvterdi buǵattaýǵa qatysty ekenin atap ótken jón. Ádilet mınıstrligi jýrnalısterdi rastalmaǵan málimetterdi jarııalamastan buryn, jaǵdaıdy túsindirý úshin ýákiletti organǵa júginýge shaqyrady», - delingen vedomstvo málimetinde.