Ádilet mınıstrligi taýarlyq belgilerdi zańsyz paıdalanǵany úshin ótemaqyny óndirip alýdy usyndy

ASTANA. QazAqparat - QR Ádilet mınıstrligi taýarlyq belgiler zańsyz paıdalanylǵan jaǵdaıda ótemaqyny alýǵa taýarlyq belgiler ıeleriniń quqyǵyn belgileýdi usynýda.

Bul týraly búgin «Zııatkerlik menshik salasynda zańnamany jetildirý máseleleri jóninde Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» zań jobasyn tanystyrý barysynda QR Ádilet mınıstrligi Zııatkerlik menshik quqyǵy departamentiniń basshysy Abzal Estaev málim etti, dep habarlaıdy QazAqparat.

«Qoldanystaǵy zańnamada bireýlerdiń taýarlyq belgini zańsyz paıdalanǵany úshin ótemaqynyń kepildi kólemine taýarlyq belgi ıesiniń quqyǵy sekildi talaptar qaralmaǵan. Osyǵan baılanysty taýarlyq belgi ıesiniń zań buzýshydan shyǵyndardy óteý ornyna ótemaqy tóletkizýdi talap etetin quqyǵyn belgileıtin tolyqtyrý Azamattyq kodekske engiziledi»,-dedi departament basshysy.

Bul turǵyda quqyq buzýshylyqtyń sıpatyna qaraı sot bekitken kólemde 500-den 10 myń AEK-ke deıin ótemaqy eskerilmek.

Onyń sózine qaraǵanda, zań jobasynyń negizgi jańashyldyqtaryna zııatkerlik menshik nysandaryn tirkeýdiń bir deńgeıli júıesin qurý; daýlardy sotqa deıin retteý múmkindikterin keńeıtý; sarapshylyq uıymǵa túsken sátten bastap taýarlyq belgilerge ótinimdi jarııalaý sekildi qadamdar enip otyr.