Ádilet mınıstrligi QR azamattyǵyn alý úshin emtıxan tapsyrý usynysyna qatysty jaýap berdi

ASTANA. QazAqparat - QR Ádilet mınıstrligi Májilis depýtaty Azat Perýashevtyń QR azamattyǵyn alýǵa nıettengen adamdardy emtıxannan ótkizý týraly usynysyna qatysty pikir bildirdi, dep xabarlaıdy QazAqparat.

«Bul óte qyzyq usynys. Kóptegen memleketterdiń tájirıbesinde bar nárse. Biraq bizge ony áli tarazylap, oń men teris tustaryn anyqtap alǵan jón. Ázirge qandaı da bir nátıjeler men buǵan qatysty Ádilet mınıstrliginiń resmı ustanymy týraly aıtýǵa erte», - dedi Ortalyq kommýnıkatsııalar qyzmetinde ótken brıfıngte Ádilet mınıstrliginiń resmı ókili Oljas Ramazanov.

Eske sala keteıik, bul usynysty májilismen Parlamenttiń tómengi palatasynyń otyrysynda jarııalaǵan bolatyn. Onyń sózinshe, Qazaqstan beıbit saıasaty men sátti ekonomıkalyq reformalarynyń arqasynda túrli memleketterdegi bosqyndar úshin tartymdy bolyp otyr. Osyǵan baılanysty, Májilis depýtaty mıgratsııalyq axýal ýshyǵyp ketpeı turǵanda kóshi-qon saıasatyn retteýdi jáne qazaqstandyq birtektilikti saqtaýdy qolǵa alýǵa úndedi.

Depýtat QR azamattyǵyn alýǵa nıettengen árbir adamdy qazaq tili, Qazaqstan mádenıeti men tarıxy, Respýblıka Konstıtýtsııasy boıynsha emtıxan tapsyrýdy mindetteýge shaqyrdy.