Ádilet mınıstrligi dıplom taratýmen aınalysatyn JOO-larǵa qatysty naqty usynystar engizbek

NUR-SULTAN. QazAqparat – Ádilet mınıstrligi Bilim jáne ǵylym mınıstrligine «dıplom basyp shyǵaratyn» JOO-larǵa qatysty naqty usynystardy engizetin boldy, dep habarlaıdy QazAqparat tilshisi.

Eske sala ketsek, Ulttyq qoǵamdyq senim keńesiniń úshinshi otyrysynda QR Prezıdenti Qasym-Jomart Toqaev dıplom basyp bere beretin joǵary oqý oryndaryn jabý qajettigin aıtqan bolatyn.

Osy máselege qatysty Ádilet mınıstrliginiń alqa májilisinde Nur-Sultan qalasy ádilet departamentiniń basshysy Alan Tilenshıev usynys bildirdi.

«Memleket basshysynyń Joldaýyn júzege asyrý aıasynda biz toqsan saıyn attestattaý ótkizemiz. Prezıdent óz sózinde «dıplom basyp shyǵaratyn» JOO-lardyń jumysyn toqtatýdy tapsyrǵan edi. Osy attesttaý aıasynda biz Bilim jáne ǵylym mınıstrligimen jumys júrgizip, osyndaı stýdentterdiń tizimin bergen durys bolar edi. Sebebi zańgerlik mamandyq týraly dym bilmeıtin stýdentter de bar. Olardyń daıyndyǵy da óte nashar», - dedi Alan Tilenshıev

Óz kezeginde Ádilet mınıstri Marat Beketaev bul usynysty qoldap, Bilim jáne ǵylym mınıstrligine tıisti hat joldanatynyn málim etti.