Ádilet mınıstrligi 658 halyqaralyq sharttyń jobasyna saraptama júrgizgen

NUR-SULTAN. QazAqparat – Ádilet mınıstriliginde ádilet organdarynyń 2021 jylǵy jumysyn qorytyndylaýǵa arnalǵan keńeıtilgen alqa májilisi ótti, dep habarlaıdy QazAqparat tilshisi.

Beınekonferentsııa formatynda ótken jıynda vedomstvo tarapynan bir jyl ishinde atqarylǵan isterdi QR Ádilet vıtse-mınıstri Azamat Ámirǵalıev baıandady.

«Memleket basshysy jeti zańǵa qol qoıdy, on segiz zań jobasy Parlamenttiń qaraýynda. 9 myńnan astam normatıvtik quqyqtyq akt jobasyna zań saraptamasy júrgizildi. Memlekettik organdardyń 7 myńnan asa aktisi tirkeldi», - dedi mınıstrdiń orynbasary.

Aıtýynsha, normashyǵarmashylyq protsesti jetildirý boıynsha da biraz sharalar qabyldanǵan kórinedi.

«Memleket basshysy qol qoıǵan zań sheńberinde azamattarǵa normatıvtik quqyqtyq aktilerdi «Ashyq normatıvtik quqyqtyq aktilerdiń» portalynda talqylaý múmkindigi usynyldy.

Jergilikti memlekettik basqarý organdarynyń normatıvtik quqyqtyq aktilerdi tirkeýdiń ortalyqtandyrylǵan formatyna kóshti. 2 myńnan astam normatıvtik quqyqtyq akti tirkeldi.

658 halyqaralyq shart jobasyna, onyń ishinde ekonomıkalyq ıntegratsııa máseleleri boıynsha 122 jobaǵa saraptama júrgizildi», - dedi Azamat Ámirǵalıev.