Ádilet mınıstrligi 2020 jyly qansha partııany tirkeýden bas tartty

NUR-SULTAN. QazAqparat – 2020 jyly Ádilet mınıstrligine tirkelý úshin 9 partııa ótinim berdi. Bul týraly QR Ádilet mınıstri Marat Beketaev aıtty, dep habarlaıdy QazAqparat tilshisi.

«2020 jyly 9 partııa tirkeý úshin ótinim berdi. Ózderińiz de biletindeı, bul protsess 2 kezeńnen turady. Aldymen partııa qurǵysy keletin adamdar toby ótinim beredi. Eger bul ótinim talaptardyń barlyǵyna saı kelse 2 kezeńge jiberiledi jáne sezd ótkizip, qol jınaıdy. Ótken jyly 9 ótinim túsip, olardyń altaýynyń qujattary zańnama talaptaryna saı kelmegendikten keri qaıtaryldy. Olar barlyq kemshilikterin túzetip, ótinimderin qaıtadan bere alady», - dedi mınıstr Zoom platformasynda ótken baspasóz máslıhaty barysynda.

Onyń atap ótýinshe, olardyń barlyǵyna kemshilikterdi túzetý týraly habarlama jiberildi.

«Talaptarǵa saı kelgen úsh topqa da habarlama berdik. Olar endi sezd ótkizip, kelesi qujattar toptamasyn usynýy qajet. Adamdardyń bir toby sezd ótkizip, qujattar toptasyn berdi. Qazir atalǵan qujattardy tekserý júrip jatyr», - dedi Marat Beketaev.

Onyń aıtýynsha, tirkeýge qujat usynǵan partııalardy ózge de memlekettik organdar tarapynan tekserý júrgiziledi. Al atalǵan partııalardy tirkeýge usynǵan tulǵalardy aty-jónderi qupııa.

«Jarııa etýge quqymyz joq. Mundaı aqparatty partııalardyń ózderi ǵana bere alady», - dedi mınıstr.