Ádilet mınıstri Konstıtýtsııalyq Sottyń quzyretin túsindirdi
Atap aıtqanda, palata otyrysynda «Qazaqstan Respýblıkasynyń Konstıtýtsııalyq Soty týraly» Konstıtýtsııalyq zań jobasy birinshi oqylymda qaralyp jatyr.
«Konstıtýtsııalyq Sottyń quzyreti Konstıtýtsııanyń 72-babymen tikeleı retteledi. Máselen, Konstıtýtsııalyq sottyń quzyretine saılaýdy ótkizýdiń durystyǵy máselelerin, Parlament qabyldaǵan zańdar men halyqaralyq sharttardyń respýblıka Konstıtýtsııasyna sáıkestigin qaraý, sondaı-aq Konstıtýtsııa normalaryna resmı túsindirme berý jatqyzylǵan», - dedi Q.Mýsın.
Osy oraıda ol Konstıtýtsııalyq Keńestiń barlyq qoldanystaǵy fýnktsııalary Konstıtýtsııalyq Sotqa berilgenin aıtty.
«Biraq, eń mańyzdysy, Konstıtýtsııaǵa engizilgen ózgeristerge sáıkes, Konstıtýtsııalyq Sot azamattardyń ótinishteri boıynsha olardyń quqyqtary men bostandyqtaryna tikeleı tıetin normatıvtik quqyqtyq aktilerdiń Konstıtýtsııaǵa sáıkestigin qaraıtyn bolady. Sondaı-aq, Konstıtýtsııalyq Sotqa júginý quqyǵy Bas Prokýror men Adam quqyqtary jónindegi ýákilge berildi», - dedi mınıstr.