Ádilet mınıstri elimizde qaryz óteýdiń jańa múmkindikteri týraly aıtty
Bul týraly QR Ádilet mınıstri Marat Beketaev málim etti, dep habarlaıdy QazAqparat tilshisi.
«Avtomattandyrýdyń taǵy bir artyqshylyǵy – endi sot oryndaýshy óziniń jeke vırtýaldy kabıneti arqyly barlyq atqarýshylyq áreketterdi jasaı alady. Bul memlekettik organdardyń 58 aqparattyq júıesimen biriktirý nátıjesinde múmkin boldy», - dedi M. Beketaev Parlament Májilisindegi Úkmet saǵatynda.
Osy oraıda Bas prokýratýranyń - «Quqyq qorǵaý jáne arnaıy organdardyń aqparattyq almasý júıesi»; Joǵarǵy Sottyń - «Tórelik» júıesi; Ulttyq qaýipsizdik komıtetiniń - «Búrkit» júıesi; Іshki ister mınıstrliginiń - «Baqylaý» júıesi; Qarjy mınıstrliginiń - «Elektrondyq memlekettik satyp alý» júıesi; Tsıfrlyq damý mınıstrliginiń - «E-gov» portaly qamtylǵan.
«Sonymen qatar, birqatar ekinshi deńgeıli bankterdiń aqparattyq júıelerimen biriktirý júrgizildi, ıaǵnı jıyrma jeti bankten on tórt bank. Halyqqa yńǵaıly bolýy úshin júıede kassalyq qyzmetter men «Qazposhta», «Kaspi Bank» termınaldary arqyly qaryz tóleý múmkindigi usynyldy. Elimizde eki júzden astam termınal ornatyldy. Atalǵan qyzmetti shamamen júz mıllıon teńge somasyna tórt myńnan astam boryshker paıdalandy. Buǵan qosa, bereshekti post.kz jáne kaspi.kz mobıldi qosymshalary arqyly tóleýge bolady. Búginde alpys toǵyz myń boryshker bir mıllıard teńgeden astam somadaǵy qaryzyn osy qosymshalar arqyly tólegen. Halyqqa bul yńǵaıly jáne ýaqytty únemdeýge múmkindik beredi. Barlyq bankterdi osyndaı qyzmetterdi uıymdastyrýǵa shaqyramyn», - dep túsindirdi vedomstvo basshysy.
Onyń aıtýynsha, keleshekte azamattarǵa burynǵydaı sot oryndaýshyǵa tólem týraly túbirtekti kórsetýdiń esh qajeti bolmaıdy. Tólemdi onlaın júzege asyrǵannan keıin barlyq shekteýler, sonyń ishinde elden syrtqa shyǵýǵa shekteý avtomatty túrde sheshiledi. Halyqqa boryshkerlerdiń biryńǵaı tizimine jáne shyǵýǵa shekteý tizimine qoljetimdilik qamtamasyz etilgen. Ózara baılanys úshin atqarýshylyq is júrgizý taraptarynyń kabıneti jumys isteıdi. Azamattar men zańdy tulǵalardy olardyń mindettemeleri týraly ýaqytyly ári tıimdi habarlandyrý úshin «SMS–habarlama» servısi quryldy.
«Endi mobıldi telefon nómerlerine isti qozǵaý jáne protsessýaldyq áreketter týraly SMS-ter kelip túsedi. Demek, habarlamany ýaqytyly alyp turý úshin nómirler men mobıldi telefonnyń tirkeýden ótýi qajet ekenin eskergen jón. Buǵan qosa, búgin satylýda turǵan tyıym salynǵan múlik týraly málimet tek elektrondy satý alańynda ǵana emes, múlik satýǵa arnalǵan ınternet-resýrstarda ornalastyrylady. Bul satyp alýshylar sanyn kóbeıtedi», - dedi Marat Beketaev.