Ádil jáne tıimdi ekonomıkalyq saıasat júrgizilýi kerek - Memleket basshysy

ASTANA. QazAqparat - Elimizde ádil báseke ornap, bıznes adal jumys istese, ádiletti naryqtyq ekonomıka qurylady. Bul týraly Úkimettiń keńeıtilgen otyrysynda QR Prezıdenti aıtty, dep habarlaıdy QazAqparat Aqordanyń baspasóz qyzmetiniń Telegramdaǵy BORT№1 arnasyna silteme jasap.

«ÚShІNShІ. Ádil jáne tıimdi ekonomıkalyq saıasat júrgizilýi kerek. Elimizde ádil báseke ornap, bıznes adal jumys istese, ádiletti naryqtyq ekonomıka qurylady. Eń aldymen, otandyq kásipkerlerdiń senimin arttyrý óte mańyzdy. Ekonomıkany monopolııadan aryltý úshin mekemearalyq komıssııa quryldy. Bul komıssııa qajetti jumysty tıimdi júrgizip jatyr.

Qazir jeke menshikke zańsyz ótip ketken aktıvterdi qaıtarýǵa basa mán berilip otyr. Biraq keıbir máseleler nazardan tys qalyp barady. Ekonomıkaǵa memlekettiń qatysýyn azaıtý, monopolısterdi ózine janama qatysy bar naryqtyń qyzmetine aralastyrmaý – óte mańyzdy jumys. Ákimshilik kedergilerdi azaıtyp, naryqqa baǵa belgileý arqyly qysym jasaýdy toqtatý kerek», - dedi Prezıdent.

Foto: t.me/bort_01