«Ádil saılaý úshin» shtabyna shaǵym túsken joq - Baýyrjan Maqulbaev

ALMATY. QazAqparat- Saılaý kúni almatylyqtar «Ádil saılaý úshin» uıymyna zańgerlik kómek surap júgingen joq. Bul týraly baspasóz máslıhatynda «Qazaqstan zańgerler odaǵy» Almaty qalalyq fılıalynyń tóraǵasy, «Ádil saılaý úshin» qalalyq shtabynyń jetekshisi Baýyrjan Maqulbaev málim etti, dep habarlaıdy QazAqparat tilshisi.

Spıker qaıta saılaý quqyǵynsyz 7 jyldyq prezıdenttik merzim - postkeńestik keńistiktegi absolıýtti jańalyq ekenin atap ótti.

«7 jyl prezıdenttik merzim saılanǵan kandıdatqa óz baǵytyn júzege asyrýǵa tolyq kóńil bólýge múmkindik beredi jáne prezıdenttik bılikti monopolııasyzdandyrýǵa baǵyttalǵan konstıtýtsııalyq reformanyń jalǵasy bolyp tabylady», - dedi Baýyrjan Maqulbaev.

Onyń aıtýynsha, saılaý kúni «Ádil saılaý úshin» shtabyna eshkimnen aryz-shaǵym túsken joq.

«Dese de, qoǵam ókilderi barǵan saılaý ýchaskelerinde eskertýler boldy. Mysaly, daýys berý kabınalarynyń birine erli-zaıyptylar birge kirgen, bul jaǵdaıǵa baılanysty anyqtaý barysynda jubaıy múgedek bolyp shyqty jáne zańǵa sáıkes, oǵan senimdi tulǵanyń kómegi qajet edi»,- dedi spıker.

Sonymen qatar, ol qyrkúıek aıynda qurylǵan «Ádil saılaý úshin» birlestiginiń quramynda tek zańgerler ǵana emes, notarıýstar, qorǵaýshylar jáne 400-ge jýyq túrli maman ıesi bar ekenin eske saldy.