Ádil memlekettik apparat, ádil sot bolǵanda naǵyz birtutas ult qalyptasady - Elbasy

ASTANA. QazAqparat - Ádil memlekettik apparat, ádil sot bolǵanda naǵyz birtutas ult qalyptasady. Bul týraly búgin Qazaqstan halqy Assambleıasynyń «Máńgilik el: bir el - bir taǵdyr» atty HHІІ sessııasynda QR Prezıdenti, Qazaqstan halqy Assambleıasynyń Tóraǵasy Nursultan Nazarbaev aıtty.

«Ekinshiden, Zań ústemdigi. Barlyq sýdıalar, quqyq qorǵaý organdary tek Konstıtýtsııaǵa, Zańdarǵa baǵynýy tıis. Munan basqa eshkimge de, eshteńege de emes. Adam óziniń quqyn, mindetteri men múmkinshilikterin qurmetteı me? Onda sotta qorǵaýy tıis. Sot ádil, jemqorlyqqa boı aldyrmaǵan, jaqsy jalaqy alatyn, qatań jazalaıtyn bolýy qajet», - dedi QR Prezıdenti.

Memleket basshysy óz sózinde memlekettik apparat, sot júıesi ádil ári jemqorlyqtan ada bolsa, onda elimizdiń ındýstrııasy, ekonomıkasy, bıznes damıtyndyǵyn basa aıtty.

«Sonda biz ádil memlekette ómir súretin bolamyz. Bizge ádil memlekettik qyzmet, ádil sot qyzmet kórsetetin bolady. Mine, bul bizdiń atqaratyn isterimizdiń túp máni. Sizder muny qarapaıym jolmen ǵana júzege asyrady dep oılamańyzdar. Bizderge qoldaý qajet. Qarsylyq ta bolady, bizderge bul jolda kóptegen jaıttan arylýǵa týra keledi», - dedi Elbasy.

«Mine, eger osyndaı memlekettik apparat bolsa, oǵan ulty men dinine, múmkinshiligine qaramastan ashyq bolady, kedergi bolmaıdy. Eger ádil sot bolatyn bolsa, eger dál osy negizde ındýstrııa men bıznes damıtyn bolsa, onda naǵyz birtutas ult qalyptasady», - dep túıindedi oıyn Elbasy.