Ádil Ǵalıahmetov: Ár oıyn saıyn sheberligim shyńdala túsedi
23 jastaǵy Á.Ǵalıahmetov eresekter arasyndaǵy Olımpıadaǵa alǵash ret qatysyp, birinshi múmkindiginde-aq fınalǵa joldama aldy. Keshe ol short-trekten 1500 metrge júgirip, 8-orynǵa taban tiredi.
Erteń sportshy 500 metrlik júgirý jarysyna qatysady.
«Sońǵy jyldary úlken eńbek atqardyq. Bizdiń Qazaqstanda short-trek damyp jatqanyn kórsettik. Barlyq jankúıerlerge alǵys aıtamyn. Áli de Instagramda, áleýmettik jelilerde barlyǵy jazyp, quttyqtap jatyr. Keshe bárin emotsııamen aıtyp tastaǵan soń qazir aıta qoıar jańalyǵym joq. Erteń bizde 500 metrlik jarys bolady, soǵan daıyndalyp jatyrmyz», - dedi Á. Ǵalıahmetov ZOOM-konferentsııasynda.
Sonymen birge, sportshy áli de tájirıbe jınaqtaý keregin aıtty.
«Meniń tájirıbem jetpeı qaldy dep oılaımyn, óıtkeni short-trektiń óz erekshelikteri bar. Qarsylastar basyp ozǵanda úlken jyldamdyqpen óte shyǵady. Oǵan iliný úshin ózińe de jyldamdyqty arttyryp, sál shetke shyǵý kerek. Bálkim osyny jasaýǵa tájirıbem jetpegen shyǵar, endi jyldamdyq arttyraıyn desem, meni basyp ozyp ketkender kóp boldy. Bári óz kezegimen jáne ár oıyn saıyn sheberligim shyńdala túsedi», - dedi sportshy.
Ádil Ǵalıahmetov 500 metrlik jarysta Denıs Nıkısha, Abzal Ájiǵalıev syndy óte jyldam balalar bar ekenin aıtty.
«Olar keshe fınalda bolǵan sportshylardan talaı ozǵan. Búgin jattyǵý kezinde kóremiz, sońǵy jattyǵýymyzdy jasap, ózimizdiń qandaı formada ekenimizdi tekseremiz jáne nátıjesin erteń kórsetemiz dep oılaımyn», - dedi Á. Ǵalıahmetov.