Ádil baǵa qoıady dep senemiz: Mınıstr Reseı gazyn arzanǵa satyp alý jaıynda pikir bildirdi

ASTANA. QazAqparat – Osyǵan deıin Reseı Qazaqstanǵa gazdy arzan baǵada satady degen habar taraǵan edi. Keıin reseılik Gazprom kompanııasy atalǵan aqparatty joqqa shyǵardy. Bul jaǵdaıǵa Energetıka mınıstri Almasadam Sátqalıev pikir bildirdi, dep habarlaıdy QazAqparat tilshisi.

«Kez kelgen eksporttyq ónimniń baǵasy - ózindik quny, memleketter aýmaǵy arqyly tasymal jáne belgili bir ónimdi óndirýshiler negizgi ózindik qunǵa salatyn kiristen turady. Túsinemiz, gaz baǵasyn qoıatyn - «Gazprom» korporatsııasy men Reseı úkimeti. Baǵa belgileý Reseı jáne Belarýspen dostyq qarym-qatynas negizinde ádil bolatynyna senimdimiz», - dedi Almasadam Sátqalıev Úkimet otyrysynan keıin BAQ ókilderiniń saýalyna jaýap bere otyryp.

Mınıstrdiń málimdeýinshe, baǵa belgileıtin kezde Qazaqstan men Reseı arasyndaǵy strategııalyq áriptestik faktorlary jáne ekonomıka parametrleri nazarǵa alynady.

Eske salsaq, buǵan deıin Energetıka mınıstri Almasadam Sátqalıev buǵan Reseı gazdy Eýropa elderinen birneshe ese arzan baǵamen beretinin málimdegen edi.

Óz kezeginde Gazprom kompanııasy mınıstrdiń málimdemesin joqqa shyǵaryp, aqparattyń shyndyqqa janaspaıtynyn jarııalady.