Ádil Ahmetov Túrki memleketteri uıymynyń mańyzy jaıynda aıtty

ASTANA. QazAqparat – Túrkitildes elderdiń yntamaqtastyǵy jańa deńgeıge kóterilip otyr. Bul týraly elordadaǵy birinshi Ortalyq Azııa medıaforýmynda belgili qoǵam qaıratkeri Ádil Ahmetov aıtty, dep habarlaıdy QazAqparat tilshisi.

«Bul medıaforýmnyń basty maqsaty – Ortalyq Azııany birtutas mádenı aımaq retinde kórsetýdi kózdeıtin ortaq medıa keńistik qurý. 2021 jylǵy 12 qarashada Túrkııanyń Ystanbul qalasynda ótken alqaly samıtte túrki álemin damytýǵa serpin beretin jańa sheshimder qabyldanǵan bolatyn. Óıtkeni, dál sol sammıtte túpki tegi bir túrki jurty ortaq múddege birikti. Tarıhy, tili, dili, mádenıeti jáne dini ortaq elderdiń baýyrlastyǵy men yntamaqtastyǵy birden jańa deńgeıge kóterildi. Ystanbul sammıtiniń barysynda biraýyzdan qabyldanǵan sheshim boıynsha burynǵy Túrki keńesi Túrki memleketteri uıymy bolyp qaıta quryldy. Búgingi tańda bul halyqaralyq uıymnyń Ystanbuldaǵy hatshylyǵymen qatar, Prezıdentter keńesi, Syrtqy ister mınıstrleriniń keńesi, Túrki memleketteri uıymynyń Aqsaqaldar keńesi, Bakýdegi parlamenttik assambleıa, Astanadaǵy Túrki akademııasy, Ankradaǵy TÚRKSOI - Túrki mádenıeti halyqaralyq uıymy sekildi ınstıtýttary da qalyptasyp úlgerdi. Túrkitildes memleketterdiń sammıti turaqty ótkizilip keledi», - dedi Á.Ahmetov.

Sonymen qatar ol Túrki memleketteri uıymynyń mańyzyna toqtaldy.

«Túrki memleketteri uıymy bireýlerdi qorqytý nemese úrkitý úshin qurylǵan uıym emes. Kerisinshe, egemendigimizdiń jáne terrıtorııalarymyzdyń tutastyǵyn saqtaýǵa, sondaı-aq memleketterimizdiń qaýipsizdigin syrttan tóngen suq kózderden qorǵaý maqsatynda qurylǵan ortaq beıbit uıym», - dedi ǵalym.

Ádil Ahmetovtiń paıymynsha, Túrki memleketteri uıymynyń qyzmetin buqaralyq aqparat quraldary arqyly belsendi túrde dáripteý kerek.

«Búgin uıymdastyrylyp otyrǵan Ortalyq Azııa medıaforýmynyń mańyzy arta túsedi degen oıdamyn. Bul forýmnyń keleshegi zor ekenine búgin sóz alǵan mártebeli meımandardyń pikiri dálel», - dedi ol.

Budan buryn habarlanǵandaı, Astanada І Ortalyq Azııa medıaforýmy jumysyn bastady.

Aıta keteıik, búgin Qazaqstan Prezıdenti Qasym-Jomart Toqaev Túrki memleketteri uıymynyń Bas hatshysy Kýbanychbek Ómirálıevti qabyldady.

Memleket basshysy Qazaqstan uıymnyń negizin qalaýshy eldiń biri retinde túrki memleketterimen kópjaqty yntymaqtastyqty damytýǵa múddeli ekenine toqtalyp, hatshylyqtyń jumysyna barynsha qoldaý kórsetetinin jetkizdi.