Ádil Ahmetov: Saıasatker retinde prezıdent saılaýyn ótkizý durys sheshim dep sanaımyn

NUR-SULTAN. QazAqparat - Memleket basshysy Qasym-Jomart Toqaevtyń keshegi úndeýin halyq óte jyly qabyldady. Belgili memleket jáne qoǵam qaıratkeri, elshi-dıplomat, QHA Ǵylymı-sarapshylyq keńesiniń múshesi Ádil Ahmetov kezekten tys saılaýǵa qatysty osylaı dep oıyn aıtty, dep habarlaıdy QazAqparat tilshisi.

«Memleket basshysy Qasym-Jomart Toqaevtyń keshegi úndeýin halyq óte jyly qabyldady dep oılaımyn. Bizdiń halyqtyń kózi ashyq, kókiregi oıaý. Dál qazir bizge birlik kerek. Osy joldy ary qaraı jalǵastyrýymyz kerek. Prezıdent keshegi úndeýinde «Altaý ala bolsa, aýyzdaǵy ketedi, tórteý túgel bolsa, tóbedegi keledi» dedi. Mine, osyndaı ustanymdy uran etken kandıdat saılaýǵa tússe, jeńedi», - deıdi Ádil Ahmetov.

Qoǵam qaıratkeriniń aıtýynsha, saılaý erte me, kesh pe - báribir ótetin edi.

«Biraq, onyń erte ótkeni durys. Memlekettiń aldynda aýqymdy saıası-áleýmettik máseleler tur. Solardyń bárin tııanaqty iske asyrý úshin ózine nyq senimdi bılik kerek. Men saıasatker retinde osy sheshim óte durys dep bilemin», - deıdi elshi-dıplomat.

Eske sala ketsek, aǵymdaǵy jyldyń 9 maýsymynda elimizde kezekten tys prezıdent saılaýy ótedi. Bul týraly respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty. Memleket basshysynyń Qazaqstan halqyna joldaǵan úndeýiniń tolyq mátinin myna siltemeden oqýǵa bolady.