Ádepsiz qylyǵy úshin jumystan qýylǵan Laýra Myrzaǵalı nelikten jańa qyzmetke taǵaıyndaldy

ALMATY. QazAqparat - QR Memlekettik qyzmet isteri agenttigi Almaty qalasy boıynsha departamentiniń basshysy Ildar Úısimbaev Laýra Myrzaǵalıdyń memlekettik qyzmetten bosatylǵannan keıin densaýlyq saqtaý salasyna qaıta oralýyna qatysty pikir bildirdi, dep habarlaıdy QazAqparat tilshisi.

Jaqynda BAQ betterinde qalalyq Qoǵamdyq densaýlyq saqtaý basqarmasy basshysynyń orynbasary bolǵan Laýra Myrzaǵalıdyń Almaty oblysyndaǵy aýrýhanalardyń birine jumysqa ornalasqany týraly aqparat paıda boldy.

«Ol buryn memlekettik qyzmette jumys istedi. Jasaǵan ádepsiz qylyǵy úshin jazasyn aldy. Ol qyzmetinen bosatyldy. Laýra Myrzaǵalı úsh jyl boıy memlekettik qyzmette jumys isteý quqyǵynan aıyryldy. Onyń jańa taǵaıyndalýyna keletin bolsaq, meniń bilýimshe, ol memlekettik qyzmetke jatpaıtyn vedomstvolyq baǵynysty densaýlyq saqtaý uıymyna kirgen. Qoldanystaǵy zańnamaǵa sáıkes bul shekteýler vedomstvolyq baǵynysty uıymdarǵa, kvazımemlekettik sektorǵa qoldanylmaıdy. Sondyqtan agenttik onyń memlekettik qyzmetten basqa taǵaıyndaýlaryn qadaǵalaýǵa quqyǵy joq. Eger ol kvazımemlekettik sektordaǵy densaýlyq saqtaý uıymyna taǵaıyndalsa, bul onyń quqyǵy», - dep jaýap berdi Ildar Úısimbaev óńirlik kommýnıkatsııalar qyzmetinde ótken brıfıngte.

Aıta keteıik, byltyr Memlekettik qyzmet isteri departamentindegi Ádep jónindegi keńes músheleri joǵary laýazymdy tulǵany qyzmetinen bosatý jóninde sheshim qabyldaǵan edi.

Eske salaıyq 2022 jyly áleýmettik jelilerde Almaty qalalyq qoǵamdyq densaýlyq saqtaý basqarmasy basshysynyń orynbasarynyń qyzmetkermen syıaqy týraly sóz talastyrǵan vıdeosy taraǵan bolatyn.

Keıin Memlekettik qyzmet isteri departamenti Almaty qalalyq qoǵamdyq densaýlyq saqtaý basqarmasy basshysynyń orynbasary Laýra Myrzaǵalıǵa qatysty shýly vıdeony tekserdi.