Ádemi sóıleı bilý, jaqsy jumys isteýmen teń emes - Qoshanov

ASTANA. QazAqparat - Qaraǵandy obysynda alǵash ret turǵyn úı qurylysy aýdandaryna kommýnıkatsııa ótkizýge 2 mlrd teńgeden astam qarajat jumsalady. Bul týraly QazAqparat ákimniń baspasóz qyzmetine silteme jasap habarlaıdy.

«Nurly jer» baǵdarlamasyn júzege asyrýdyń basym baǵyttarynyń biri jeke turǵyn úı qurylysyn damytý bolyp tabylady. Jergilikti atqarýshy bılik qurylys aýdandaryna ınjenerlik-kommýnıkatsııalyq ınfraqurylym (IKI) ótkizýdi qamtamasyz etýge mindetti. 

Qaraǵandy oblysynyń ákimi Erlan Qoshanov bul jumystardy baqylaýda ustap otyr. Oǵan qatysty esep kezekti apparattyq jınalysta tyńdaldy. 

«Qosymsha bólingen qarajatty eskere kele, búgingi tańda oblysta IKI ótkizýdi qarjylandyrý 2,1 mlrd teńgeni quraıdy», - dedi oblys ákiminiń birinshi orynbasary Asylbek Dúısebaev. 

Jezqazǵanda bıylǵy jyly 670 jer ýchaskileri tapsyryldy. Alaıda, ótken jyldary ótinish berýshiler kezekke turarda JSN belgilemegendikten, rásimdeýge qatysty qıyndyqtar týyndady. Qazir olardyń zańdy ekendikterin tekserý júrgizilýde. 

Qaraǵandyda 3500-ge jýyq jer ýchaskilerin tapsyrý josparlanǵan, onyń ishinde jańalary - 756, osyǵan deıin berilgenderi - 2700-den asady. Olarǵa kommýnıkatsııalar ótkiziledi. 

Apparattyq jınalysta Balqash qalasynyń basshylyǵy synǵa alyndy. Munda IKI ótkizýge qajetti soma tabylmaǵan. Degenmen ótken jyly qala basshylyǵy jol jóndeýge bólingen qarajatty ıgere almaı, oblystyq qazynaǵa qaıtarǵan bolatyn. Osy sebepti jeke turǵyn úı qurylysyn damytýǵa qatysty problemalar qalyp otyr. 

«Bul máseleni zerttep shyǵyp, kimniń kinásinen bolǵanyn balqashtyqtarǵa jarııalaý kerek. Ádemi sóıleı bilý, jaqsy jumys isteýmen teń emes», - dep narazylyǵyn bildirdi Erlan Qoshanov.