«Ádebıet álemindegi - áıel júregi» atty shyǵarmashylyq kesh ótedi

ASTANA. QazAqparat - 1 maýsym kúni saǵat 17.00-de Astana qalasyndaǵy QR Ulttyq akademııalyq kitaphanada qos qalamger oqyrmandarmen júzdesedi.

Atap aıtqanda, QR Jazýshylar odaǵynyń múshesi, jazýshy-jýrnalıst, respýblıkalyq «Juldyz» jýrnalynyń bólim meńgerýshisi, birneshe prozalyq kitaptardyń avtory Zarıa Jumanova jáne fılologııa ǵylymdarynyń kandıdaty, aqyn, ádebıet synshysy, jyr jınaqtar men monografııalardyń avtory Gúlzada Nıetqalıeva Elorda turǵyndary aldynda shyǵarmashylyq izdenisteri jaıly aıtyp beredi.

Bul kezdesýdiń taqyryby da erekshe. «Ádebıet álemindegi - áıel júregi» atty shyǵarmashylyq keshte qos qalamger óz oılarymen bólisedi.

Aıta ketý kerek, Zarıa Jumanovanyń esimioqyrmanǵa jaqsy tanys, ol - Qazaqstan Jazýshylar odaǵynyń Ǵ.Mustafın atyndaǵy ádebı syılyǵynyń ıegeri, Soros zamanaýı óner ortalyǵynyń, EQYU jabyq báıgeleriniń júldegeri, « Túngi ottar», «Ekige bólinbeıtin kelinshek», «Siz izdegen adam», «Ultyn súıgen ulylar» atty kitaptardyń avtory.

Al aqyn Gúlzada Nıetqalıeva Mahambet atyndaǵy syılyqtyń ıegeri, «Qıǵashtyń qarlyǵashy», «Aqbota kúndi ańsaýmen», «Ardaqtym», «Allajar», «Dara», «Esenǵalı Raýshanovtyń poezııasy» atty jyr jınaqtary men monografııalardyń avtory ekeni belgili.

Osy mádenı is-sharaǵa qoǵam qaıratkerleri, zııaly qaýym ókilderi, aqyn-jazýshylar, jyr súıer qaýym men BAQ ókilderi shaqyrylyp otyr.