Ádebıet akademııasy jastardyń kitap oqýyn yntalandyrsa ıgi - jas maman
Onyń aıtýynsha, Elbasynyń qatysýymen ótken Jastar jylynyń saltanatty ashylýynda kókeıkesti máseleler kóterilip, kókeıge qonymdy usynys-pikirler aıtylyp, kóptegen jobalar usynyldy.
Solardyń qatarynda semeılik aqyn Mereı Qart Memleket basshysynan jas qalamgerlerge arnalǵan ádebıet akademııasyn qurýǵa qoldaý bildirýdi ótindi.
«Ádebıet akademııasy ashylsa, jastar bilimge, kitap oqýǵa umtylady, ádebıetimizdiń áleýeti artady dep oılaımyn. Qazirgideı jahandaný kezeńinde jetkinshek urpaqqa kitap oqýdyń mańyzdylyǵyn uǵyndyra bilgen jón. Bizdiń mektebimizde kitaphanashy Marjan Qajymova «READx» jobasy aıasynda Nazarbaev zııatkerlik mektebiniń 100 kitabyn nasıhattaý maqsatynda qazaq jáne orys ádebıeti shyǵarmashylyq jınaqtaryn oqýǵa keńes berdi. Qazirgi kezde oqyrmandar Muhtar Áýezovtiń «Qorǵansyzdyń kúni», Ospanhan Áýbákirovtiń «Siz ben biz», Sáken Júnisovtiń «Aqan seri» týyndylaryn oqyp, kitaptan alǵan áserlerimen bólisip júr, - deıdi jas maman.
Onyń aıtýynsha, alys aýyldarda jas mamandar, muǵalimder aldyna urpaq tárbıesimen baılanysqan bıik maqsat qoıa bilýi kerek. «Qazirgi tańda memleket tarapynan bilim salasyna, ondaǵy mamandarǵa únemi qoldaý kórsetilip keledi. Sondyqtan jan-jaqty bilimdi ustaz bolý, eńbegimizdiń jemisin kórý tek ózimizge baılanysty. Bizge Qaztalov aýdandyq bilim berý bólimi, tájirıbeli áriptesterimiz jol kórsetip, bilgenin aıtyp otyrady. Ózim osy kezge deıin QR Bilim jáne ǵylym mınıstriniń Qurmet gramotasy, «Úzdik jas ustaz - 2018» atalymy boıynsha aýdan ákiminiń jastar syılyǵy jáne basqa marapattarǵa ıe boldym. Biz, jastar únemi adal eńbek etip, aýyl-aýdanymyzdyń, jalpy elimizdiń damýyna úles qosamyz dep senemin», -dep túıindedi oıyn Ú.Orynǵalıev.
Eske sala keteıik, budan buryn batysqazaqstandyq jas mamannyń aýylda at sportyn damytý týraly oı-tolǵamyn jarııalaǵan bolatynbyz.