Addıs-Abebada Semeı polıgony jabylýynyń 30 jyldyǵyna arnalǵan semınar ótti
Semınarǵa Efıopııa Syrtqy ister mınıstrliginiń, Afrıka odaǵy komıssııasy hatshylyǵynyń, dıplomatııalyq korpýstyń, sonyń ishinde «ıadrolyq bestik» pen Stokgolm bastamasyna kiretin memleketterdiń, ókilderi, qoǵam qaıratkerleri, beıbitshilik pen qaýipsizdikti zertteý ınstıtýtynyń, Dıalog, zertteýler men yntymaqtastyq ortalyǵynyń sarapshylary, Addıs-Abeba ýnıversıtetiniń stýdentteri, sondaı-aq birqatar efıopııalyq basylymdardyń jýrnalısteri qatysty.
Semınarǵa qatysýshylarǵa arnaǵan sózinde Qazaqstan Elshisi Barlybaı Sadyqov memleketimizdiń jahandyq qarýsyzdaný men ıadrolyq qarýdy taratpaý úderisine qosqan úlesi, QR Tuńǵysh Prezıdenti – Elbasy Nursultan Nazarbaevtyń halyqaralyq bastamalary, onyń halyqaralyq beıbitshilik pen qaýipsizdikti nyǵaıtýdaǵy róli týraly aıtyp berdi.
Bıyl qurlyq elderi Afrıkadaǵy ıadrolyq qarýdan azat aımaq týraly Pelındab kelisimine qol qoıý ashylýynyń 25 jyldyǵyn atap ótedi. Aǵymdaǵy jyly Ortalyq Azııada ıadrolyq qarýdan azat aımaqtyń (Semeı sharty) qurylǵanyna 15 jyl tolady. Qazirgi tańda eki aımaq arasynda yntymaqtastyq týraly kelisimge qol qoıý josparlanýda.
Іs-sharada ǵylymı-zertteý ınstıtýttarynyń ókilderi, Efıopııanyń qoǵam qaıratkerleri, Indonezııa, Shvetsııa, Iran elshileri, Japonııa elshiliginiń qyzmetkeri sóz sóılep, Qazaqstannyń belsendi qatysýymen qarýsyzdaný jáne álemde ıadrolyq qarýdy taratpaý rejımin nyǵaıtý jónindegi halyqaralyq qaýymdastyqtyń birlesken jumysty odan ári jalǵastyrý qajettigin atap ótti.
Semınar sheńberinde Andre Sıngerdiń «Jel qaıdan keldi» atty derekti fılmi kórsetildi, sondaı-aq Semeı polıgonynyń jabylýynyń 30 jyldyǵyna oraı «Ólimnen de myqty» atty fotokórme uıymdastyryldy.
Semınar qorytyndysy boıynsha qatysýshylar Qazaqstan men onyń halqynyń Halyqaralyq ıadrolyq qarýsyzdaný jáne taratpaý protsesine qosqan úlesin joǵary baǵalap, bizdiń elmen dostyq baılanystardy nyǵaıtýǵa qyzyǵýshylyq tanytty.