Adamzat tarıhtyń eń qıyn kezeńin bastan keship jatyr – Máskeý jáne Reseı patrıarhy
«Álemdik jáne dástúrli dinder lıderleriniń pandemııadan keıingi kezeńdegi adamzattyń rýhanı jáne áleýmettik damýyndaǵy róli» plenarlyq otyrysynda Máskeý Patrıarhatynyń Syrtqy shirkeý baılanystary bóliminiń tóraǵasy Mıtropolıt Volokolamskıı Antonıı Máskeý jáne Reseı patrıarhy Kırılldiń quttyqtaý sózin oqyp berdi.
«Bul forým pandemııadan keıingi kezeńdegi adamdardyń rýhanı jáne qoǵamdyq ómirindegi dinı kóshbasshylardyń róline arnalǵan. Búgingi tańda adamzat zamanaýı tarıhtyń eń qıyn kezeńderiniń birin bastan keship jatqanyna kúmán joq. Koronavırýs pandemııasynan týyndaǵan qıyndyqtarǵa azyq-túlik, energetıkalyq jáne ekonomıkalyq problemalar qosyldy. Bul máseleler adamgershilik qundylyqtarǵa súıenbesten álemdi qurý áreketterinen týyndady jáne sońǵy 20 jylda halyqaralyq qatynastardaǵy ádilet túsiniginiń joǵalýyna ǵana emes, qatal qaqtyǵystarǵa, soǵys shıelenisterine, álemniń túkpir-túkpirinde terrorızm men ekstremızmniń taralýyna ákep soqty», - deıdi Máskeý jáne Reseı patrıarhy Kırıll.
Onyń aıtýynsha, qazir adamdarǵa aqparat aǵynynda baǵdar tabý, ıdeologııalyq úgitterge qarsy turý, parasatty aqyl men rýhanı álemdi saqtaý burynǵydan da qıyn.
«Biz tarıhı faktilerdiń burmalanýyna jáne buqaralyq sananyń buryn-sońdy bolmaǵan manıpýlıatsııalaryna kýá bolyp otyrmyz. Sondyqtan da qoǵamda súıispenshilik, meıirimdilik pen janashyrlyq azaıyp barady. Qoǵamdyq keńistikte biz búkil halyqtarǵa, mádenıetter men dinderge jekkórinishke toly sózderdi jıi estımiz jáne oqımyz. Álemniń keıbir ámirshileri saılaǵan dıktatýra, básekelestik jáne konfrontatsııa joly adamzatty ajalǵa jeteleıdi. Mundaı jaǵdaıda dinı senim adamdardyń kózin ashyp olardy dıalog pen yntymaqtastyq jolyna qaıtara alady, óıtkeni dástúrli dinderde adam bolmysynyń negizgi adamgershilik qaǵıdattary turaqty bolyp qala beredi», - deıdi patrıarh Kırıll.
Óz sózinde Máskeý men Reseı patrıarhy barlyq elden bedeldi din kóshbasshylaryn bir ortaǵa jınaǵany úshin Qazaqstan bıligine alǵys aıtty.
«Qazirgi qıyn jaǵdaıda dıalogty kórý múmkindigi – óte qundy resýrs. Bul qazirgi problemalardy sheshý jolyndaǵy mańyzdy qadam. Din kóshbasshylarynyń bitimgershilik dıalogy jáne adamdardyń sanasy men júregine áser ete alýy qazirgi syn-qaterlerdi eńserýge, halyqaralyq qatynastardy úılestirýge, ádil tártip álemin ornatýǵa yqpal ete alady jáne solaı etýge tıis dep senemin. Sezge qatysýshylarǵa mazmundy ári paıdaly suhbat, ózara túsinistik pen kelisim tileımin», - dedi Máskeý men búkil Reseı patrıarhy.