Adamzat bir-birine aıtylǵan ýájdi estı alamaǵannan zardap shegip otyr - Ravıl Gaınýtdın

NUR-SULTAN. QazAqparat – Barsha adamzat pen din kóshbasshylary álemdegi beıbitshilik úshin ǵıbadat qylýy kerek. Bul týraly RF Musylmandary rýhanı basqarmasynyń tóraǵasy, Reseı múftıler keńesiniń tóraǵasy Ravıl Gaınýtdın aıtty, dep habarlaıdy QazAqparat tilshisi.

«Adamzat bir-birine aıtylǵan ýájge qulaq aspaı, osynyń saldarynan zardap shegip jatyr. Bul kemshilik adam tabıǵatyna tán emes. Ózara baılanysty qalpyna keltirip, beıbitshilikti qorǵaý úshin jer betindegi túrli pikirlerdi tyńdaýymyz kerek. Biz ózara kelisim jolymen júrýimiz kerek», - dedi R. Gaınýtdın Álemdik jáne dástúrli dinder lıderleriniń VII sezinde.

Onyń aıtýynsha, qazirgi kezde adamzat ózgeristerge toly kezeńde ómir súrip jatyr. Beıbitshilik pen adamgershilik baǵytyndaǵy ýaǵyzdardyń qazirgi sansyz shıelenisterdiń aldyn ala almaǵany ókinishti jaǵdaı.

«Barlyq izgi nıetti adamzat, din kóshbasshylary álemdegi beıbitshilik úshin duǵa etýi kerek. Osy beıbitshilik qundylyǵyn ýaǵyzben, ósıet arqyly jaqyndatý mańyzdy», - dedi Reseı múftıler keńesiniń tóraǵasy.

Onyń paıymynsha, qazirgi qaqtyǵystardyń túpki sebebin halyqqa jete túsindirý kerek.

Budan buryn habarlanǵandaı, elordadaǵy Táýelsizdik saraıynda Álemdik jáne dástúrli dinder lıderleriniń VII sezi ótip jatyr.

Qazaqstan Prezıdenti Qasym-Jomart Toqaev din kóshbasshylarynyń adamgershilik qundylyqtardy dáripteýge qosqan úlesin atady.