Adamnyń bet-álpetin anyqtaý texnologııasy: Vokzaldarda synaqtan ótti

ASTANA. QazAqparat - QR Іshki ister mınıstrligi beınebaqylaý júıesi boıynsha birneshe pılottyq jobany bastap ketti. Sonyń aıasynda vokzaldar men turǵyn úılerde ornatylǵan kameralardy jan-jaqty paıdalanyp, qoǵamdyq qaýipsizdik sharalaryn júrgizý kózdelip otyr, dep habarlaıdy QazAqparat tilshisi.

Máselen, vokzaldarda ornatylǵan kameralarǵa qatysty joba «Transtelekom» AQ-symen birlesip qolǵa alyndy. Oǵan sáıkes, vokzaldyń kez kelgen beınebaqylaý kamerasyna qosylyp, bárin onlaın rejımde baqylaýǵa bolady. Kóliktiń memlekettik tirkeý nómirin engizip, atalǵan nómirge saı keletin kólikterdiń tizimin, vokzalǵa kirgenin jáne shyqqanyn taýyp alýǵa múmkindik bar. Tipti, adamnyń bet-álpetin anyqtaý fýnktsııasy da bar. Ol úshin fotony júkteý kerek. Elektrondy júıe oǵan uqsaıtyn barlyq adamdardy, 100 protsentke sáıkes keletin bir adamdy da taýyp bere alady.

«Qazirgi kezde biz Almaty-1, Almaty-2, Qaraǵandy, Astana jáne Býrabaı vokzaldarynda jańa júıeni synaqtan ótkizdik. Aldaǵy ýaqytta taǵy 12 vokzal qosylady degen jospar bar. Sóıtip, osy tájirıbeni barlyq respýblıkaǵa taratamyz», - deıdi «Transtelekom» AQ ókili.

Elektrondy júıe basqa organdardyń jumysyna bóget jasamaıdy. Kameralardy bir ýaqytta barlyq quziretti organdar paıdalana alady.

Al «Qazaqtelekom» AQ-nyń jobasy turǵyn úılerde arnaıy kameralardy ornatý arqyly qoǵamdyq tártipti birlesip baqylaýdy kózdeıdi.

«Kameralardyń sapasy da, túsirý dáldigi de joǵary. Al úıdiń turǵyndary arnaıy mobıldi qosymsha arqyly aýlasyn jáne podezin baqylap, qandaı da bir tártip buzýshylyq bolsa, birden quqyq qorǵaý organdaryna xabar bere alady. Budan bólek, ýchaskelik ınspektor da planshetpen bárin kóre alady», - dep atap kórsetti «Qazaqtelekom» AQ ókili Manas Ospanov.

Onyń aıtýynsha, búginde atalǵan jobamen Astanada 32 turǵyn úı qamtylǵan. Jyldyń aıaǵyna deıin respýblıka boıynsha kameralardyń sanyn barynsha arttyrý josparlanyp otyr. Atalǵan júıeniń jekemenshik beınebaqylaý kompanııalary usynatyn qyzmetten basty aıyrmashylyǵy abonettik tólemi tómen bolady.

Aıta keteıik, búgin QR Parlament Senatynyń bir top depýtattary ishki ister mınıstrliginiń texnıkalyq jaǵdaıymen tanysyp shyǵyp, osy salada atqarylǵan jumysqa óz baǵalaryn berdi.