Adamdarǵa kómekteskim kelip turady – túrkistandyq dáriger

TÚRKІSTAN. QazAqparat – Táýlik boıy alǵashqy kómek kórsetýge asyǵatyn jedel járdem qyzmetkerleri qıyn da qyzyqty sátterge kóp kezdesedi. Tipti, ómirlerine qaýip tónetin kezder de kóp, dep habarlaıdy QazAqparat tilshisi.

Túrkistandyq Quralaı Shalabaeva jedel járdem qyzmetinde 22 jyldan beri eńbek etip keledi. Osy ýaqyt aralyǵynda aq halatty abzal jan kóptegen naýqastarǵa alǵashqy kómek kórsetip alǵysyn alǵan. Tipti, ólim men ómirdiń ortasynda qalǵan jandarǵa da kómek berip, qol ushyn sozǵan kezderi kóp.

«Shaqyrtý boıynsha barǵan úıimizdiń aýlasy keń eken. Tipti úı qaqpadan biraz jerde ornalasqan. Sodan biz qolymyzdaǵy qurylǵylarmen kirip bardyq. Sol sátte naýqas esin joǵaltyp, klınıkalyq ólimge ketti. Qolymda kógerip barady. Kómekshimdi defıbrıllıatorǵa jumsadym da, ózim kómek kórsetýge kirisip kettim. Ózi de kishkene aşy sýdan ishken eken, arasynda qusyp jatyr. Oǵan qaraıtyn biz joq, aýzynan úrlep, aýa berip, keýdesin urǵylap betin beri qarattyq. Sodan aýrýhanaǵa alyp bardyq. Esin jıǵan soń, ol meni nege aýrýhanaǵa alyp kelgensińder dep ashýlanyp, shý shyǵarǵany bar»- deıdi ol.

Jalpy Quralaı Tynysbekqyzynyń eńbek jolynda mundaı sátter kóp. Máselen, jańa týǵan jas ananyń da ómirin saqtap qalǵan. Kóp qan ketkendikten jolda qajetti em-dom jasap, aýrýhanaǵa jetkizgen. Al, nashaqorlardyń ortasyna túsip qalýyn búginde qyzyqty jaıtqa balap, kúlip eske alady.

«Birde shaqyrtýǵa barǵanymyzda 4 nashaqordyń ortasyna túsip qaldyq. Eki qyzbyz. Qatty qoryqtyq. Sodan qýlyqqa basyp, bir qurylǵynyń kerek ekenin aıtyp kólik júrgizýshisin shaqyrdyq. Ol ishke engende kóńilimiz ornyna túsip, naýqasqa kómek kórsetip, tez tez ketip qaldyq» - deıdi aǵa dáriger.

Quralaı bala kezinen ıtten qatty qorqady. Sol sábı kúngi qorqynysh áli de seıilmegen. Sondyqtan shaqyrtýǵa shyqqanda ıtti kórse «úrkip» turady.

«Shaqyrtý boıynsha úılerge barsaq, kópshiliginiń qaqpasynyń aldynda ıt turady. «Qappaıda, qappaıdy, kire ber» dep jatady. Birde bir úıdiń aýlasyna kirsek, aldymyzda úlken alabaı tur. Alǵashqy da baıqamaı qaldyq. Bizge qaraı úre bastaǵanda qoryqqanymnan aıqaılap, qasymdaǵy áriptesimniń ústine shyǵyp ketippin. Qolymdaǵy zattarymdy basyna qoıyp, eki aıaǵymmen arqasyna minip alǵanmyn. Ony ózimdi baıqamaı qaldym. Bizdiń áreketimizdi kórgen ıt bizden qashyp ketti»- deıdi ol.

Búginde Quralaı Shalabaeva Túrkistan oblystyq jedel járdem berý stantsııasynyń operatıvti bóliminde aǵa dáriger qyzmetin atqarýda. Bos kezinde qoǵamdyq jumystarǵa da belsene aralasyp turady. Jyl saıyn uıymdastyrylatyn «Densaýlyq festıvaline» qatysyp, alǵys hattarǵa ıe bolǵan. Odan bólek 22 jyldyq eńbek jolynda QR jedel medıtsınalyq járdem qaýymdastyǵynyń «Úzdik qyzmetker» tósbelgisimen marapattalǵan.

«Adamdarǵa kómekteskim kelip turady. Ári naýqasqa alǵashqy kómek kórsetý meniń azamattyq boryshym dep bilemin. Eń mańyzdysy marapat emes, halyqtyń alǵysy odan da qymbat. Jasy 90-dy alqymdaǵan ájemizge alǵash kómek kórsettik. Arada birneshe kún ótken sol ájeı maǵan arnap óleń shyǵaryp, berip jiberipti. Men úshin úlken motıvatsııa boldy. Ol óleńdi kózimniń qarashyǵyndaı saqtap kelemin» - deıdi aǵa dáriger.