Adamdarǵa kómekteskim keledi – 30 jyl memqyzmette eńbek etetin maman

ÓSKEMEN. QazAqparat – Tájirıbeli memlekettik qyzmetshi Lıýbov Soveko Shyǵys Qazaqstan oblysynyń azamattyq qorǵaý salasynda 30 jyldan astam ýaqyt jumys istep keledi, dep habarlaıdy QazAqparat tilshisi.

23 maýsym – memlekettik qyzmetshiler úshin kásibı mereke. Búgingi tańda oblystyq Tótenshe jaǵdaılar departamentinde 36 memlekettik qyzmetshi jumys isteıdi. Onyń biri – Lıýbov Soveko.

Ol Altaı aýdanynyń TJ basqarmasynda 1992 jyldan bastap bas maman bolyp jumys istep keledi. Bul qyzmetke kezdeısoq kelgen joq. «Ómir boıy bir saryndy jumys istegenshe adamdarǵa qıyn sátte kómekteskim keldi», - deıdi Lıýbov Soveko. Onyń bólimshesi qoıylǵan mindetterdi sátti oryndap, óńirdi jáne onyń turǵyndaryn túrli tótenshe jaǵdaılardan qorǵaıdy, azamattardy oqytady.

«Bas maman Lıýbov Petrovna kún saıyn ofıtser-jigittermen qatar aýdandaǵy jaǵdaıǵa monıtorıng jasaıdy. Tótenshe jaǵdaılardyń aldyn alý jumystaryn baqylaıdy, aımaqtyń jáne onyń turǵyndarynyń qaýipsizdigi úshin josparlar men mańyzdy qujattar ázirleıdi. Onyń qajyrly eńbeginiń arqasynda byltyrǵy jáne bıylǵy sý tasqyny maýsymy Altaı aýdanynda oıdaǵydaı ótti», - delingen departamenttiń baspasóz qyzmeti taratqan aqparatta.

Lıýbov Soveko qyzmetin adal atqaryp, únemi ózin-ózi jetildirýge tyrysady.

«Qıyndyqtar adamdy shyńdaı túsedi. Іske adal qaraýdyń, kásibılik pen eńbekqorlyqtyń arqasynda eń kúrdeli mindetterdi sátti oryndaýǵa bolady», - deıdi tájirıbeli memlekettik qyzmetshi.