Adamdardyń nemquraılyǵy órttiń kóbeıýine ákelip otyr – TJD

ASTANA. QazAqparat – Elordanyń tótenshe jaǵdaılar departamenti kún jylynýyna baılanysty órt qaýipsizdigi erejelerin qatań saqtaý kerektigin eskertti. Qalalyq TJD memlekettik órt baqylaý basqarmasynyń bastyǵy Erkin Otarymǵalıuly turǵyndardyń qarapaıym erejelerdi saqtaı bermeıtinin aıtyp otyr, dep habarlaıdy QazAqparat tilshisi.

«Kúnniń jylynýyna baılanysty qurǵaq shóp pen qamystar órti jıileı túsedi. Ókinishke qaraı, adamdardyń qarapaıym órt qaýipsizdigine nemquraıly qaraýy órtke alyp keledi. Dalada ot jaqqanda, tabıǵat aıasyna saıahatqa shyqqanda jáne saıajaıda qoqys órtegende qaýipsizdik erejelerin saqtaǵan jón. Sebebi abaısyzdyq, adamdardyń órt qaýipsizdigi erejelerin saqtamaýy, taǵy qaıtalaımyn, nemquraıly qaraýy tilsiz jaýdyń kóbeıýine ákelip otyr», - dedi Erkin Otarymǵalıuly Astana qalalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, ot ýaqtyly sóndirilmese onyń arty joıqyn órtke ákelýi múmkin.

«Dala órtin qolda bar quralmen sóndirýge tyrysqan jón. Órt qaýipsizdigi qaǵıdasyna sáıkes, ot jaǵý, qoqys órteý ǵımarattar men qurylystardan keminde 50 m qashyqtyqta júzege asýy tıis. Joǵaryda atalǵan talaptardy buzǵan adam Ákimshilik quqyq buzý týraly kodeksiniń 410-babyna sáıkes ákimshilik jaýapkershilikke tartylady. Órt qaýipsizdigi erejelerin saqtaý qaýiptiń aldyn alady jáne adam ómirin saqtaıdy», - deıdi ol.