Adamdardan úrikpeıdi: SQO-da elikter eldi mekenderge kele bastady

<p>Soltústik Qazaqstan oblysynda elik kóbeıdi. Kóptigi sonshalyq, eldi meken kóshelerine de kire bastaǵan. Tabıǵat janashyrlary janýarlardy atýǵa bolmaıtynyn eske salady, búginde eliktiń bireýi 1,3 mln teńgege baǵalanǵan, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Áleýmettik jelide elikterge qatysty beınejazbalar kóbeıdi. Bireýinde bul janýarlar eldi mekenniń kóshesine kirip ketse, endi birinde avtomobıl jolynyń ústinde júr. Jol jıeginde jaıylǵan úıir-úıir elik adamdardan úrikpeıtin bolǵan.

SQO Tabıǵı resýrstar jáne tabıǵat paıdalanýdy retteý basqarmasynyń janýarlar álemi jáne balyq resýrsy bóliminiń basshysy Mıhaıl Nıkıtınniń aıtýynsha, óńirde elikterdiń kóbeıýine baılanysty ańshylyq sharýashylyqtar kúsheıtilgen jumys tártibine kóshti. Maqsat – janýarlardy qorǵaý, brakonerlikke jol bermeý.

«Óńirde 47 ańshylyq sharýashylyq bar. Olar reıdterdiń sanyn arttyrdy. Sondaı-aq qazirgi ýaqytta avtomobıl joldaryna arnaıy belgiler ornatý boıynsha ákimshilik polıtsııaǵa usynym ázirlep jatyrmyz. Ol elikter jaıylatyn oryndarǵa qoıylady», - deıdi Mıhaıl Nıkıtın.

SQO-da buǵy, maral, dońyz mekendeıdi. Jyldyń basynda júrgizilgen sońǵy sanaq boıynsha óńirde sibir eliginiń ǵana 18 myńǵa jýyǵy bar. Qysqa qaraı olardyń sany artady. SQO orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Oleg Bespalovtyń aıtýynsha, jyldyń osy mezgilinde óńirge Reseıdiń kórshi oblystarynan elikterdiń mıgratsııasy bastalady. Onyń bir sebebi – kóbeıýine baılanysty jemshóp jáne jaıly jer izdep aýýy. Desek te, bul janýarlardy ruqsatsyz atýǵa qatań tyıym bar.

«Byltyr elikterdi zańsyz atýǵa qatysty 14 derek tirkeldi. Kóbiniń bas bostandyǵy shekteldi. Bireýi keltirgen shyǵynǵa baılanysty 7 jylǵa túrmege otyrǵyzyldy. Bıyl osyndaı 11 fakti anyqtaldy. 4 elik atqan Ǵabıt Músirepov aýdanynyń turǵyny memleketke 4,5 mln teńge shyǵyn keltirgeni úshin 3 jylǵa bas bostandyǵynan aıyryldy. Qyzyljar aýdanynyń eki turǵyny bir elik atyp, eki jylǵa sottaldy. Olar endi keltirgen shyǵynnyń ornyn da toltyrady», - deıdi Oleg Bespalov.