Adamdar parany bıtkoınmen bere bastady – Marat Bashımov

NUR-SULTAN. QazAqparat – Álemde sybaılas jemqorlyqtyń jańa formaty paıda boldy, adamdar parany bıtkoın túrinde bere bastady. Bul týraly QR Sybaılas jemqorlyqqa qarsy is-qımyl agenttiginde ótken «Antikor Live» jobasynyń tikeleı efırinde Eýropalyq quqyq jáne adam quqyǵy ınstıtýtynyń dırektory Marat Bashımov aıtty, dep habarlaıdy QazAqparat.

«Sybaılas jemqorlyqqa qarsy is-qımyl agenttigi janynan qoǵamdyq keńes qurylǵan sátte bizden jemqorlyqpen kúres tujyrymdamasyn ázirleýge qatysty pikir, usynysty ortaǵa salýdy surady. Eń bastysy jemqorlyqtyń aldyn alýǵa qatysty usynys qoǵam úshin paıdaly ári túsinikti bolýy tıis.

Jańa tujyrymdama nesimen erekshe degenge kelsek, qujatta sybaılas jemqorlyqpen kúresýdiń joly qarapaıym, túsinikti tilmen jazylǵan. Qasym-Jomart Toqaev Memleket basshysy bolyp saılanǵan sátten bastap ádiletti qoǵam, tıimdi memleketti damytýdy jalǵastyrýdy usyndy. Oryndy usynys, ádiletti qoǵam bolǵan jerde ár azamat ózin jaqsy sezinedi. Osy oraıda Sybaılas jemqorlyqqa qarsy is-qımyl tujyrymdamasy adamdardy adal bolýǵa, aqshany eńbekpen tabýǵa shaqyrady. Onyń ishinde memlekettik qyzmetkerler de bar. Jáne tujyrymdama damyǵan elderdegideı qoǵamnyń ıgiligi úshin júzege asyrylýy tıis», - dedi Marat Bashımov.

Onyń aıtýynsha, qazaqstandyqtar pandemııa bastalǵaly paraqorlyqpen kúreste asa belsendilik tanytyp jatyr.

«Sońǵy ýaqytta álemde sybaılas jemqorlyqtyń jańa formaty paıda boldy desek bolady. Endigi ýaqytta adamdar parany aqshamen, syılyq jasaý arqyly ǵana emes, bıtkoın túrinde de usyna bastady. Bul jańashyldyq bizdiń elge áli jete qoıǵan joq, sondyqtan da onyń aldyn alǵan jón. Osy maqsatta zamanaýı ІT tehnologııalardyń qyr-syryn jetik meńgergen otandyq jas mamandardy kóptep ázirleý qajet. Sosyn olardy sybaılas jemqorlyqpen kúres isi jáne basqa da memlekettik qyzmetke tartý kerek», - deıdi ol.