Adam saýdasynyń maqsaty - eńbek kúshin paıdalanyp, jynystyq qatynasqa májbúrleý
«Qazaqstanda adam saýdasy jappaı sıpatqa ıe emes. Avstralııalyq quqyq qorǵaý uıymynyń málimetterine sáıkes, Qazaqstan Respýblıkasy adam saýdasy deńgeıi boıynsha 170 eldiń ishinde shamamen 85-86-shy orynda tur», - dedi ol.
Osy rette Ábishev elimizdiń Bas prokýratýrasynyń málimetterine súıene otyryp, jyl saıyn Qazaqstanda adam saýdasyna qatysty 350-400 qylmystyq is qozǵalatyndyǵyn atap ótti. Onyń aıtýynsha, birinshi orynda adamdardy eńbek kúshi retinde paıdalaný, al ekinshi orynda jynystyq qatynasqa májbúrleý tur.
«Al Amerıkada kerisinshe, bul elde jynystyq qatynasqa paıdalaný basym bolsa, adam kúshin paıdalaný nóldik deńgeıde», - dedi komıssııa hatshysy.
Aıta keteıik, búgin Úkimet úıinde QR Prezıdenti janyndaǵy Adam quqyqtary jónindegi komıssııanyń sarapshylar keńesi Elbasy qaraýyna engiziletin «Qazaqstan Respýblıkasyndaǵy eńbek mıgranttary jáne adam saýdasy qurbandarynyń quqyqtaryn qorǵaýdyń ózekti problemalary» atty taldaý baıandamasynyń jobasy talqylandy. Baıandama usynymdary Qazaqstandaǵy jumys úshin joǵary bilikti mamandardy tartýǵa jáne eldiń barlyq óńirlerinde adam saýdasy qurbandaryna arnaıy áleýmettik qyzmet kórsetý standarttaryn engizýge baǵyttalǵan. Munan bólek, atalǵan qujatta azamattyq qoǵam ınstıtýty áleýetiniń resýrstaryn adam saýdasyna qarsy is-qımyl, halyqty quqyqtyq aǵartýdy jandandyrý salasynda paıdalaný qajettigi atalyp ótken.
Jalpy, talqylaýǵa qatysqan halyqaralyq jáne ulttyq sarapshylar komıssııanyń bul taldaý baıandamasy biregeı ekenin jáne TMD men Baltyq elderiniń quqyq qorǵaý keńistiginde kezdespeıtindigi aıtylǵan.
Sarapshylyq keńestiń jan-jaqty talqylaýynan keıin komıssııa baıandamasy Memleket basshysynyń qaraýyna jáne bekitýine joldaý týraly sheshim qabyldandy.