Adam saýdasy úshin sottalǵandar mádenıet jáne óner uıymdaryna jumysqa alynbaıdy

ASTANA. QazAqparat – Adam saýdasy qylmysy boıynsha sottalǵan azamattar mádenıet jáne óner salasyndaǵy uıymdarǵa jumysqa ornalasa almaıdy. Bul týraly «Ashyq» NQA portalynda jarııalanǵan «Qazaqstan Respýblıkasynda adam saýdasyna qarsy is-qımyl týraly» QR Zańynda jazylǵan, dep habarlaıdy QazAqparat tilshisi.

«Kisi óltirý, densaýlyqqa qasaqana zııan keltirý, halyqtyń densaýlyǵy men ımandylyǵyna qarsy, jynystyq qol suǵylmaýshylyq qylmystyq quqyq buzýshylyqtary úshin, ekstremıstik nemese terrorıstik qylmystar, adam saýdasy úshin sottylyǵy bar nemese bolǵandar bala asyrap alý jónindegi agenttik fılıalynyń jáne ókildiginiń qyzmetkerleri bola almaıdy. Sondaı-aq, olar jetim jáne ata-anasynyń qamqorlyǵynsyz qalǵan balalarǵa kómek kórsetý jónindegi uıymnyń qyzmetkerleri bola almaıdy. Sonymen qatar, bilim berý, tárbıeleý jáne damytý, demalý men saýyqtyrýdy uıymdastyrý, dene shynyqtyrý jáne sport, medıtsınalyq qamtamasyz etý, áleýmettik qyzmetter kórsetý, kámeletke tolmaǵandardyń qatysýymen mádenıet jáne óner salasyndaǵy uıymdarǵa jumysqa ornalasýǵa jol berilmeıdi», - delingen zańda.

Aıta keteıik, ashyq talqyǵa shyǵarylǵan zań adam saýdasyna qarsy is-qımyl salasyndaǵy qoǵamdyq qatynastardy retteýge jáne saladaǵy memlekettik saıasatty iske asyrýǵa baǵyttalǵan.

Qujat 27 aqpanǵa deıin ashyq talqylaýda bolady.