Adam saýdasy úshin izdeýde júrgen Ózbekstan azamaty astanadan ustaldy

NUR-SULTAN. QazAqparat – Nur-Sultan qalasynda adam saýdasyna qatysty aıypty bolǵan Ózbekstan azamaty ustaldy, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.

«Ustalǵan er adam 2014 jyly Ózbekstannyń 6 azamatyn jalaqysy joǵary jumysqa turǵyzýǵa ýáde berip Qazaqstanǵa alyp keledi. Aıypty Almaty qalasyna jetkende otandastarynyń tólqujatyn tartyp alyp, olardy basqa adamdarǵa tapsyrady. Osylaısha atalǵan 6 azamat 7 aı boıy qıyn jáne aýyr jaǵdaıda jumys isteýge májbúr bolǵan. Sondaı-aq, ustalǵan azamattyń 2015 jyly adam saýdasy úshin Ózbekstan Respýblıkasynda 5 jylǵa bas bostandyǵynan aıyrylǵany belgili boldy», - delingen habarlamada.

Elordalyq polıtsııa departamentiniń málimitine sáıkes, óz elinde bas bostandyǵynan aırylǵan azamat 2019 jyly sottyń sheshimimen jazanyń qalǵan bóligin shartty túrde óteý úshin bosatylǵan.

«Merziminen buryn bosatylyp, jazasyn shartty túrde ótep júrgen er adam Qazaqstan Respýblıkasynyń aýmaǵyna qashyp ketedi. Tıisinshe oǵan Ózbekstanda izdeý jarııalanady.Qazirgi ýaqytta sot sheshimimen er adam qamaýǵa alyndy, ony Ózbekstan Respýblıkasyna ekstradıtsııalaý máselesi sheshilýde», - dep málimdedi departamentten.

Aıta keteıik, atalǵan kúdikti elordada ótip jatqan «Stop trafık» atty jedel-aldyn alý is-sharasy barysynda ustalyp otyr.

Adam saýdasyna qatysty qylmystyń aldyn alý, anyqtaý jáne ashý maqsatyn kózdegen profılaktıkalyq shara Nur-Sultan qalasynda 22 qarasha men 1 jeltoqsan aralyǵynda ótedi.