Adam saýdasyna qatysty zańnamalyq baza kúsheıtildi – Artýr Lastaev
«Qazaqstan halyqaralyq qaýymdastyqtyń bir bóligi bolǵandyqtan, birqatar konventsııa aıasynda adam saýdasyna qarsy kúres halyqaralyq mindettemelerimizdiń biri sanalady. Birinshiden, biz zańnamalyq bazany nyǵaıttyq, ony halyqaralyq standarttarǵa sáıkestendirdik. Qazirgi kezde ulttyq standarttardy odan ári jetildirý turǵysynda tıisti taldaý jasalyp jatyr. Jalpy, Qazaqstan mundaı qylmystar sany boıynsha aldyńǵy qatarda emes. Adam saýdasyna qarsy is-qımyl tek tergeý, qylmystardy anyqtaý jáne sot arqyly jazanyń bultartpastyǵyn qamtamasyz etý ǵana emes ekenin túsiný kerek. Bul turǵyda tutas áleýmettik-ekonomıkalyq is-sharalar júzege asyrylady, ıaǵnı zardap shekkenderdi tirkeýden bastap, olardy ońaltýǵa deıingi aýqymdy jumystar qamtylady», - dedi A. Lastaeva elordada adam saýdasyna qarsy is-qımyl taqyrybyna arǵan jıynda.
Onyń aıtýynsha, Qazaqstan bul baǵytta aıtarlyqtaı ilgeri qadam jasady. Qazir elimiz Ortalyq Azııa óńiri men postkeńestik keńistikte, sondaı-aq basqa da elderdiń aldyna shyǵyp otyr.
«Biz óz tájirıbemizdi ózge memleketterdiń ókilderine túsindirýge daıynbyz. Sondyqtan búgin elordada ótip jatqan konferentsııada birlesken qadamdardy pysyqtaımyz», - dedi Adam quqyqtary jónindegi ýákil.
Onyń sózine qaraǵanda, Іshki ister mınıstrligi jyldyń basynan beri adam saýdasyna qatysty 197 qylmys tirkegen.
«Osy merzim ishinde atalǵan sanat boıynsha (adam saýdasy) bizdiń keńsege birde-bir ótinish túsken joq. Atap aıtqanda, adam quqyqtarynyń buzylýyna qatysty ótinishter men shaǵymdardyń jalpy sanynyń artýy baıqalyp otyr. Bıylǵy 9 aıda bizge 4800-den astam ótinish kelip tústi, bul kórsetkish byltyrmen salystyrǵanda 10%-ǵa artyq», - dedi Artýr Lastaev.
Eske sala keteıik, bıyl shilde aıynda Memleket basshysy «Adam saýdasyna qarsy is-qımyl týraly» Qazaqstan Respýblıkasynyń Zańyna qol qoıdy.
Zańda adam saýdasyna qarsy is-qımyl qaǵıdattary bekitilgen, sondaı-aq memlekettik organdardyń, jergilikti atqarýshy organdardyń jáne adam saýdasyna qarsy is-qımyl jónindegi ózge de sýbektilerdiń quzyreti bekitilgen.