Adam ómirin saqtap qalý úshin táýekelge bel býýǵa týra keledi – maman

<p>Qyzylordalyq Dınara Myrzash tótenshe jaǵdaılar salasynda on jyldan astam ýaqyttan beri jumys isteıdi. Búginde ol oblystyq Tótenshe jaǵdaılar departamentiniń Kúshter men quraldardy jedel basqarý ortalyǵynyń dıspetcheri qyzmetin atqarady. Tájirıbeli maman bıylǵy Jańa jyl merekesi qarsańynda tótenshe jaǵdaılar salasynyń qaýyrt jumysy jaıynda <a href="https://kaz.inform.kz/" target="_blank" rel="noopener">Kazinform</a> tilshisine baıandap berdi.&nbsp;</p>

- Qaı kezde de tótenshe jaǵdaılar salasynyń mamandary óz jumysyn múltiksiz atqarady. Merekelik kúnde olardyń jumys barysy qalaı órbıdi?

- Men bul salada on jyldan astam ýaqyttan beri qyzmet atqaryp kelemin. Iá, árbir kúnniń azamattar úshin qaýipsiz, tynysh ótkenine bárimiz tilekshimiz. Dese de, ómir bolǵannan keıin nebir tosyn oqıǵalar kezdesip jatady. Bul sátte tótenshe jaǵdaılar salasynyń mamandary qyzmetin joǵary deńgeıde atqarýǵa kúsh salady. Olardyń árbiri óziniń isin jaqsy biledi, tájirıbesi tolysqan, qıyn sátte naqty sheshim qabyldaı alady.

Kez kelgen tosyn oqıǵa jaıynda habarlandyrý aldymen bizge túsedi. Sodan keıin mamandar jedel túrde oqıǵa ornyna attanady. Tótenshe oqıǵaǵa tosqaýyl bolýǵa kúsh salady.

- Bıylǵy Jańa jyl merekesi qarsańynda oblysta tótenshe oqıǵalar tirkeldi me?

- Bizdiń jumys barysynda merekelik nemese jaı kúnder dep bólinbeıdi. Árbir kúnde tolyq daıyndyq jasalady. Mamandar árbir sátte jedel qyzmet atqarýǵa mán beredi. Bıyl mereke qarsańynda da kúsheıtilgen rejımde jumys atqaryldy. Eshqandaı tosyn oqıǵalar tirkele qoıǵan joq. Jumys barysy qalypty rejımde ótti.

Jańa jylǵa shyrsha qurylǵan ár aýdan, qala mańyndaǵy eldi mekenderdiń ortalyq alańyna jáne Qyzylorda qalasyndaǵy bas shyrshaǵa órt sóndirý qyzmetinen arnaıy tehnıka bólindi. Qaýipsizdikti qamtamasyz etý maqsatynda kezekshilik quryldy.

- Jalpy, sala mamandaryna qandaı talaptar qoıylady?

- Mamandar árqashan oqıǵa ornyna jyldam jetip, tótenshe jaǵdaıdyń aldyn alýǵa tyrysýy kerek. Bul – qutqarýshylardyń basty mindeti. Olardyń árqaısysy óz isin jaqsy biletin mamanǵa aınalýy tıis. Óıtkeni qutqarýshylardyń tájirıbeli bolǵany, jedel qımyldaǵany, tez sheshim qabyldaı bilgeni óte mańyzdy. Basty talap – osy.

Foto: Keıipkerdiń jeke muraǵatynan

- Olardyń daıyndyǵy qalaı júrgiziledi?

- Árbir tótenshe jaǵdaı – biz úshin úlken synaq. Onda daıyndyq, jaýapkershilik, sheberlik tarazyǵa tartylady. Ár sáttiń baǵasy bar. Qysqa ýaqyttyń ishinde tez sheshim qabyldaýǵa mindetti ekeniń esińnen shyqpaıdy. Keıbir ýaqytta adam ómirin saqtap qalý úshin táýekelge bel býýǵa týra keledi. Syn saǵatta durys sheshim qabyldaı bilgen jón.

Men árbir áriptesimmen birlese jumys isteýge kóńil bólemin. Qyzmetimdi atqarý barysynda talaı márte azamattardy qutqaryp, olardyń alǵysyna bólene bildik. Biz úshin ol – úlken mártebe. Mereıimizdi ósiredi. Halyqtyń alǵysyn alǵannan asqan marapat joq. Ár tótenshe jaǵdaı barysynda biz tııanaqty jumys isteýge tyrysamyz. Olaı etpeseń bolmaıdy. Qolyńda adam taǵdyry turǵanyn umytpaý lázim.

- Bul salany tańdaýyńyzǵa ne sebep boldy?

- Men 1988 jyly Qyzylorda gýmanıtarlyq ýnıversıtetin tehnık baǵdarlamashy mamandyǵy boıynsha bitirgen edim. Eńbek jolymdy Taraz qalasynda Kúshter men quraldardy jedel basqarý ortalyǵynda 2013 jyldyń aqpan aıynda bastadym. Al 2014 jyly Qyzylorda qalasyndaǵy №6 órt sóndirý bóliminde radıotelefonshy boldym. 2015 jyldan beri qazirgi qyzmetimdi atqaryp kelemin. Otbasylymyn, bir ul tárbıelep otyrmyn.

- Áńgimeńizge raqmet!