Adam ómirine arasha túsken 11 oqýshyny mınıstr marapattady

ASTANA. QazAqparat – Eldiń ár óńirinde adam ómirine arasha túsip, ajaldan qutqarǵan mektep oqýshylaryn Oqý-aǵartý mınıstri Ǵanı Beısembaev Astanaǵa shaqyrdy, dep habarlaıdy QazAqparat.

Búgin elordaǵa Atyraý, Qaraǵandy, Qyzylorda, Soltústik Qazaqstan jáne Túrkistan oblystarynan 11 oqýshy keldi. Olar tótenshe jaǵdaı kezinde batyl áreket jasap, ondaǵan adamnyń ómirin saqtap qaldy. Batyr balalardyń eń kishkentaıy – segiz jasar Nurıden Amantaı. Ol órt ortasynan qaryndasyn aman alyp shyqty. Ámirhan Abaı, Nurbolat Ermaǵambet jáne Sultan Malqadjar sýǵa batyp bara jatqan dosyn qutqarsa, toǵyz jasar Janserik Álim órt kezinde qaryndastary men inisine kómek kórsetti. Orazalı Zınollaev, Saıan Espýl, Maral Ganıev jáne Nurpolat Nurkeldi balalardy sýdan alyp shyqty.

Balalardy Oqý-aǵartý mınıstri Ǵanı Beısembaev alǵys hattarmen marapattady.

«Adam ómirin qutqarý - úlken erlik. Bizdiń mektep oqýshylarynyń arasynda ózgelerge úlgi bolarlyq ójet, erjúrek, batyl balalardyń bar ekendigi maqtanysh. Osyndaı azamattar tárbıelegeni úshin ata-analaryńyz ben muǵalimderińizge alǵys aıtamyn», - dedi Ǵanı Beısembaev.
Kezdesýge QR eńbek sińirgen qaıratkeri Svetlana Aıtbaeva, QR eńbek sińirgen sport sheberi, Olımpıada chempıony Serik Sápıev, qazaqstandyq dzıýdoshy jáne sambıst Rýslan Seılhanov qatysty. Batyr balalar men olardyń ata-analaryna mınıstr Alǵys hat, entsıklopedııa, sporttyq jabdyqtar jáne lagerge joldamalar tabystady.
Oqýshylar sondaı-aq Astananyń kórikti jerlerin aralady, ózderi úlgi tutatyn tulǵalarmen kezdesti. Olardyń qatarynda bokstan álem chempıony jáne Qazaqstan ulttyq quramasynyń fýtbolshylary bar.