Adam ólimine sebepker bolǵan jaýapsyz jumys berýshiler 7 jylǵa deıin sottalýy múmkin

NUR-SULTAN. QazAqparat –QR Bas memlekettik eńbek ınspektory Tólegen Ospanqulov ortalyq kommýnıkatsııalar qyzmetinde ótken brıfıngide adam ólimine sebepker bolǵan jaýapsyz jumys berýshiler qandaı jaza arqalaıtynyn aıtty, dep habarlaıdy QazAqparat tilshisi.

«Búgingi tańda eńbek ınspektsııasynyń jergilikti organdary shetelden 30-dan astam adamnan turatyn jumys kúshin tartqan 64 kásiporynda tekserý júrgizip jatyr. Tekserýde ótken jyldyń nátıjesi saraptalady. 9 aıdyń qorytyndysy boıynsha, óndiristegi jazataıym oqıǵalardyń sany joǵary bolǵanyn eskere otyryp, biz prokýratýra organdarymen birge osy organdardy tekserýge bastamashy boldyq. Bas prokýratýra búgin bizge óz málimetterin berip otyr. Iá, ókinishke qaraı, quqyq buzý faktileri, jazataıym oqıǵalardy jasyrý faktileri bar. Eńbek kodeksine arnaıy norma engizdik. Eger kez kelgen azamat travmatologııa bólimine nemese basqa medıtsınalyq bólimge túsken kezde, qandaı da bir uıymmen eńbek qatynasynda ekenin aıtsa, medıtsına mekemesi úsh kúnniń ishinde ol jumys isteıtin uıymǵa, memlekettik organdarǵa, memlekettik eńbek ınspektsııasyna jáne týystaryna bul jaıynda mindetti túrde habarlaýǵa tıis. ıAǵnı, búgingi kúni jazataıym oqıǵalardy jasyrý óte qıyn», - dedi Tólegen Qabaquly.

Sondaı-aq, eńbek qaýipsizdigin qamtamasyz etpegen jumys berýshi óz jaýapsyzdyǵynan adam ólimine sebepker bolsa, bas bostandyǵynan aıyrylatynyn aıta ketken jón.

«Eger kásiporynda kisi ólimimen aıaqtalǵan jazataıym oqıǵa bolsa, jumys berýshi tarapynan buzýshylyqtar anyqtalǵany dáleldense, ony 3 jyldan 5 jylǵa deıin bas bostandyǵyn shekteýge deıin qylmystyq jaýapkershilikke tartýy múmkin. Eger eki nemese odan da kóp adam qaıtys bolsa, onda 7 jylǵa deıin sottalady», - dedi komıtet basshysynyń orynbasary.

Buǵan deıin QR Premer-Mınıstriniń orynbasary Eraly Toǵjanov eńbek daýlaryn sheshý máselesinde Mańǵystaý oblysynyń tájirıbesin engizýdi usynǵan edi.