Adam ólimine ákep soqqan: Petropavldaǵy JEO-da jańa murjanyń qurylysy bastaldy

PETROPAVL. QazAqparat – Petropavldaǵy 2-inshi Jylý-elektr ortalyǵynda aldymen, jartylaı qulap, keıin tolyq buzylǵan tútin murjasynyń ornyna jańasy salynady. Nysannyń irgetasy qalanyp jatyr, dep habarlaıdy QazAqparat tilshisi.

«Sevkazenergo» AQ baspasóz qyzmetiniń málimetinshe, aýqymdy jumysty petropavldyq merdiger kompanııa – «Stroı tsentr Arsenal» JShS júrgizip jatyr. Jumysshylar qurylys aımaǵyna ınjenerlik kommýnıkatsııany jetkizdi, drenaj júıesin ornatyp, irgetasyn qalaý úshin qazanshuńqyr daıyndady. Nátıjesinde shuńqyrdan 4,5 myń tekshe metr topyraq shyǵaryldy.

Kelesi kezeńde irgetastyń armatýralyq qańqasy montajdalyp, negizi ázirlenedi. Murjanyń temirbeton negizin quıýǵa mamandar mamyr aıynda kún jylysymen-aq kirisýdi josparlap otyr.

«Joba boıynsha jańa tútin murjasynyń bıiktigi 180 metr, dıametri nóldik belgide 20,52 metrdi quramaq. «Stroı tsentr Arsenal» JShS 31 mamyrǵa deıin irgetasyn qalap bitýi kerek. Al 1 maýsymnan bastap iske «KazteploSPETsSTROI» JShS kirisip, tútin murjasyn kóteredi.

Bıyl, jospar boıynsha nysannyń temirbeton dińgegin tolyq kóterý qajet. Al №1 jańa murja keler jyly jazda iske qosylatyn bolady», - dedi kompanııanyń baspasóz qyzmetinen.

Esterińizge salaıyq, byltyr 20 naýryz kúni saǵat 19.20-da Petropavldaǵy Jylý-elektr ortalyǵynda tútin murjasy jartylaı qulap, saldarynan 5-inshi qazandyq agregatyn toqtatýǵa týra kelgen edi.

Úıindi astynda qalǵan áıeldiń denesi ekinshi kúni ǵana tabyldy.

Arnaıy saraptamadan keıin tútin murjasyn tolyq buzý týraly sheshim qabyldandy.

Keıin Petropavl ákimi №1 tútin murjasynyń qurylysy bastalatynyn aıtty.