Adam quqyqtary jónindegi ýákilge qazaqstandyqtardan 91 ótinish kelip tústi
«Bul qyzmetke jaqynda ǵana kiriskenimdi bilesizder. Atap aıtqanda, eleýli zańbuzýshylyqtar bar. Qyrkúıek aıynan bastap Adam quqyqtary jónindegi ýákildiń atyna 91 ótinim quqyqbuzýshylyqtarǵa baılanysty kelip tústi. Azamattar shaǵymy kóbine penıtentsıarlyq mekemelerdegi, qylmystyq atqarý júıesi mekemelerindegi azaptaýǵa qatysty», - dedi Adam quqyqtary jónindegi ýákil Elvıra Ázimova Adam quqyqtary jónindegi birinshi Eýrazııalyq forýmda.
Sonymen qatar ol 2014 jyldan bastap ulttyq preventıvtik mehanızm jumys istep jatqanyn eske saldy.
«Adam quqyqtary jónindegi ýákil, azamattyq qoǵam ókilderi qylmystyq-atqarý júıesi mekemelerine jıi baryp turady. Osy oraıda ákimshilik tarapynan azaptaýǵa baılanysty azamattardan shaǵymdar túsip jatsa, azamattyq qoǵam qatysýshylary atalǵan mekemelerge barady», - dedi E. Ázimova.
Onyń aıtýynsha, mekemelerdegi jaǵdaımen tanysqannan keıin tıisti usynymdar ázirlenedi.
«Osy sharalardyń qorytyndysy boıynsha jalpy baıandamany qabyldap, ony QR Prezıdentiniń atyna, Parlament pen Úkimetke usynýǵa tıistimiz. Sonymen qatar, qorytyndyny keńinen jarııalaýǵa mindettimiz. Osyndaı qadamdardyń arqasynda 2014 jyldan beri birqatar qylmystyq is preventıvtik mehanızm aıasynda qozǵalǵan bolatyn», - dedi Adam quqyqtary jónindegi ýákil.
Eske sala keteıik, bıyl qyrkúıek aıynyń basynda Elvıra Ázimova Qazaqstandaǵy Adam quqyqtary jónindegi ýákil qyzmetine saılandy.