Adam quqyqtary jónindegi ýákildiń qyzmetine kedergi keltirgender jazaǵa tartylady

NUR-SULTAN. QazAqparat – Adam quqyqtary jónindegi ýákil kýáger retinde aıǵaqtar berýden bosatylady. Bul týraly Májilistiń jalpy otyrysynda tıisti zań jobasyn talqylaý kezinde Senaty tóraǵasynyń orynbasary Asqar Shákirov aıtty, dep habarlaıdy QazAqparat tilshisi.

«Zań jobasyn daıyndaý kezinde halyqaralyq tájirıbeni, eń aldymen Parıj qaǵıdattary men Venetsııa qaǵıdattaryn muqııat zerdeledik. Bizge sondaı-aq alys jáne jaqyn shetelderdegi adam quqyqtary jónindegi ýákil qyzmetiniń zańnamalyq negizi men quqyq qoldaný tájirıbesi paıdaly boldy», - dedi A. Shákirov «Qazaqstan Respýblıkasyndaǵy Adam quqyqtary jónindegi ýákil týraly» zań jobasyn qaraý barysynda.

Zań jobasy Parlament depýtattarynyń bastamasymen ázirlendi. Osy oraıda ol zań jobasynyń negizgi erejelerine toqtaldy.

«Ýákildiń mártebesine, onyń qyzmetiniń qaǵıdattaryna, ıaǵnı adam men azamattyń quqyqtary men bostandyqtarynyń múddesinde zańdylyq, ashyqtyq jáne táýelsizdik qaǵıdattaryna erekshe mán beriledi. Adam quqyqtary jónindegi ýákilge onyń qylmystyq jaýaptylyǵyna nemese ákimshilik jaýapkershiligine qol suǵylmaýshylyq mártebesi beriledi. Osyǵan baılanysty ony jaýapkershilikke tartýdyń erekshe tártibi engiziledi. Sonymen qatar, ýákil kýá retinde aıǵaqtar berýden bosatylady», - dedi Senat tóraǵasynyń orynbasary.

Ýákildiń zańdy qyzmetine aralasqany nemese kedergi keltirgeni úshin jaýaptylyq engiziledi. Adam quqyqtary jónindegi ýákil laýazymynda bolýǵa baılanysty talaptar men shekteýler kózdeledi.