Adam quqyqtary jónindegi ýákil Eńbek mınıstrliginiń jaýabyna qanaǵattanbady
Aıta keterligi, úndeý hatta múmkindigi shekteýli adamdarǵa baılanysty problemalardyń keń aýqymdy spektri qozǵalyp, sondaı-aq olardy sheshý boıynsha naqty usynystar baıandalǵan edi. Osyǵan baılanysty Ulttyq quqyq qorǵaý mekemesi usynylǵan jaýap boıynsha Ombýdsmenniń múgedektigi bar adamdardy biriktiretin qoǵamdyq uıymdardymen birlesip ázirlengen naqty usynystaryna Úkimettiń ustanymy týraly tolyqqandy aqparaty qamtylmaǵanyn atap ótedi.
«Máselen, atalmysh qujatta jeke avıakompanııalarǵa qatysty ishki erejeleri týraly, osyǵan sáıkes 1-shi toptaǵy múgedektigi bar adamdar ushý kezinde ilesip júretin adamsyz bıletter satylmaıtyndyǵy, sondaı-aq múgedektigi bar adamǵa ushý kezinde týyndaıtyn onyń densaýlyǵyna zııan keltirilgeni úshin jáne qaıtys bolǵan jaǵdaıda jaýapkershilikti óz moınyna alý týraly deklaratsııaǵa qol qoıý qajettiligi týraly máseleler naqtylanbaǵan. Múgedektigi bar adamdar bul problemalarǵa áli kúnge deıin de tap bolyp otyr, mysaly, EKSPO-2017 halyqaralyq kórmesine barǵannan keıin Astana qalasyndaǵy áýejaıdan keter kezde birqatar jaǵdaılar oryn alǵan», - delingen baspasóz baıanynda.
Budan bólek, mınıstrlik usynǵan jaýapta «Qazaqstan Respýblıkasyndaǵy kólik týraly» QR Zańynyń 5-babyna orynsyz silteme ǵana berilgeni aıtylady. Ol bapta QR zańnamasynda kózdelgen jaǵdaılardy qospaǵanda, kólik kásiporyndarynyń sharýashylyq qyzmetine memlekettik organdardyń aralaspaýy týraly baıandalǵan. Sonymen qatar, atalmysh Zańnyń 6-baby kólikti memlekettik basqarý boıynsha fýnktsııany naqty ýákiletti memlekettik organǵa júkteıdi.
Budan bólek, Ombýdsmen jaýapta ınfraqurylym obektileriniń arhıtektýralyq-qurylys baqylaýy týraly usynys boıynsha Úkimettiń negizdelgen ustanymy joq ekenin alǵa tartady. Úndeýde erekshe qajettilikteri bar adamdar úshin beıimdelgen bolyp sanalatyn, biraq shyn máninde qajetti parametrlerge sáıkes kelmeıtin obektiler qurylysyna birqatar naqty mysaldary keltirilgen. Osyǵan baılanysty qurylys obektileriniń arhıtektýralyq-qurylys baqylaýyna, halyqty áleýmettik qorǵaýyna ýákiletti organdy tartý týraly zańnamadaǵy ekiushty normany atalǵan organnyń mindetti túrde qatysýymen bekitý, sondaı-aq qoǵamdyq birlestikterdi osy úderiske qatysýǵa quqyq berý usynyldy.
«Elimizdegi naqty aımaqtarynda taktıldi joldardyń, zaǵıp jáne nashar kóretin jandar úshin dybystyq baǵdarshamdardyń joqtyǵy týraly ulttyq quqyq qorǵaý mekemesiniń keltirgen shaǵymdary nazardan tys qaldy. Bul máseleler uzaq ýaqyt boıy kóterilip keledi. Ombýdsmen sondaı-aq múgedekterdi jumyspen qamtýǵa járdemdesý, soqyr jáne sańyraýlar qoǵamdyq birlestikteriniń mamandandyrylǵan kásiporyndaryna qoldaý kórsetý, olardyń jumys isteý sharttary, erekshe qajettiligi bar adamdarmen jumys isteý erekshelikterin eskere otyryp, jumys berýshilerdi osy baǵyttaǵy sheteldik jumys tájirıbesi mysaldaryna sáıkes oqytý jáne oqytýdy uıymdastyrý týraly máselelerge Úkimettiń áseri baıandalmaǵanyna nazar aýdardy.
Múgedektigi bar adamdar úshin banktik qaryzdardy, onyń ishinde tutynýshylyq nesıelerdi resimdeýge qatysty máseleler qarastyrylǵan joq. Sondaı-aq, erekshe qajettilikteri bar adamdardyń jaǵdaıyna júıeli negizde turaqty taldaýdy, ártúrli máseleler boıynsha, onyń ishinde medıtsınalyq, áleýmettik, eńbek qyzmetteri men zańgerlik kómek kórsetýge qatysty máseleler boıynsha olarǵa keńes berý úshin tegin telefon jelisiniń engizilýi boıynsha berilgen usynystar nazardan tys qaldy», - delingen baspasóz baıanynda.
Budan bólek, Ýákil penıtentsıarlyq mekemelerde múgedekterdi ustaý talaptaryna sáıkes jaǵdaı tolyq ashylmaǵanyn da atap ótedi. Atap aıtqanda, medıtsınalyq mekemelerge múgedektikti belgileý boıynsha kómek kórsetý, sondaı-aq áleýmettik qamsyzdandyrýǵa qatysty tıisti qujattardy resimdeý máselelerine baılanysty problemalar taldanbaǵan.
Atalǵan máselelerdi aǵymdaǵy jyldyń 11 qyrkúıeginde múgedekterdi áleýmettik qorǵaý salasyndaǵy Úılestirý keńesiniń jalpy respýblıkalyq selektorlyq otyrysy barysynda Ombýdsmen ókili atap ótti. Bul problemalardy ózektendirý Múgedekterdiń quqyqtary týraly konventsııany ımplementteý maqsatynda Qazaqstannyń qabyldaǵan sharalary týraly Alǵashqy baıandamasyn elimizdiń BUU Múgedekterdiń quqyqtary jónindegi komıtetinde aldaǵy ýaqytta qorǵaýymen baılanysty.
«Memleket basshysynyń Úkimet aldynda qoıǵan baǵdarlamalyq tapsyrmalarda qamtylǵan máseleniń mańyzdylyǵyn eskere otyryp, Ombýdsmen QR Eńbek jáne halyqty áleýmettik qorǵaý mınıstrine muqııat jáne nysandy taldaý jasaý maqsatynda budan buryn qozǵalǵan múgedektigi bar adamdardyń quqyqtaryn qamtamasyz etýdiń ózekti máselelerin qosymsha qaraýǵa bastamashylyq jasaý ótinishimen úndeý jasaıdy», - delingen baspasóz baıanynda.