Adam kóp jınalatyn jerlerde maska taǵýǵa keńes beremiz - bas sanıtar

ASTANA. QazAqparat – Qazaqstanda koronavırýs ınfektsııasy boıynsha epıdemıologııalyq jaǵdaı turaqty. Bul týraly Densaýlyq saqtaý vıtse-mınıstri – bas memlekettik sanıtar dáriger Aıjan Esmaǵambetov aıtty, dep habarlaıdy QazAqparat tilshisi.

«Respýblıkamyzda koronavırýs ınfektsııasy boıynsha epıdemıologııalyq jaǵdaı turaqty. Sońǵy eki aptada syrqattanýdyń tómendegeni baıqalady. Táýligine COVID-19-ǵa PTR-diń oń nátıjesimen 120 jaǵdaıǵa deıin jáne COVID-19-ǵa PTR-diń teris nátıjesimen 10 jaǵdaıǵa deıin tirkelip otyr. Aldyńǵy aptamen salystyrǵanda sońǵy aptada syrtqattaný kórsetkishi 1,7 ese tómendedi», - dedi ol Ortalyq saılaý komıssııasy otyrysynda.

Vıtse-mınıstrdiń atap ótýinshe, epıdemıologııalyq jaǵdaıdy baǵalaý matrıtsasyna sáıkes, respýblıka jáne barlyq óńirler jasyl aımaqta tur.

Sonymen qatar, 7 óńirde (Shymkent qalasy, Almaty, Atyraý, Shyǵys Qazaqstan, Qaraǵandy, Qostanaı, Mańǵystaý oblystary) R kórsetkishi birden joǵary.

«Osyǵan baılanysty bas memlekettik sanıtar dárigerdiń qaýlysyna sáıkes R kórsetkishi birden joǵary bolǵan kezde adam kóp jınalatyn oryndarda maska taǵý usynylatynyn eske salamyn», - dedi Aıjan Esmaǵambetova.