«ADAL» partııasy jumys josparyn jarııalady
«Saılaý naýqany bizdiń partııaǵa ońaı bolmady. Degenmen de jas partııa retinde eldi aralap, halyqtyń batasyn alyp, bolashaqta atqaratyn isterimizdi aıqyndadyq. Partııaǵa múshelikke tirkelgender 300 myńnan asyp ketti, áli de kelip jatyr. Bizdiń negizgi maqsatymyz –partııa retinde búginnen bastap naqty jumysqa kirisý. Naýqan ótti, saılaý nátıjesin Ortalyq saılaý komıssııasy resmı jarııalaı jatar. El óńirlerin aralaǵan kezde halqymyzǵa bergen biraz ýádemiz bar. Bul turǵyda partııanyń qurylymyndaǵy mamandardyń tájirıbesin eskerip, naqty jumysty bastaýǵa kirisemiz», - dedi «ADAL» partııasynyń tóraǵasy Serik Sultanǵalı.
Onyń aıtýynsha, qazirden bastap partııa qurylymy aýqymdy jumys bastaýdy josparlap otyr.
«Tarıhı bastama aıasynda partııanyń bolashaǵy bar ekenin kórip otyrmyz jáne oǵan kúmán joq. Jas partııa ekenimizdi moıyndaımyz, sondyqtan ózimizdiń nátıjeli jumysymyzdy kórsetýge tıispiz. Ár salada bizdiń mamandar bar. Biz evolıýtsııaǵa ekpin qoıǵan partııamyz», - dedi S. Sultanǵalı.
Onyń sózine qaraǵanda, partııanyń tuǵyrnamasynyń arqasynda árbir aýyldyń, aýdannyń, oblystyń, qalanyń problemasy anyqtaldy. Osy oraıda partııa ókilderi máselelerdi sheshý úshin óz kómegin usynatyn bolady.
Taratylǵan málimet boıynsha 11 jeltoqsannan 8 qańtarǵa deıin partııa ókilderi 5161 kezdesý ótkizip, oǵan 152 822 adam qatysqany belgili boldy. Olardyń qorytyndysy boıynsha 73 myńy partııa saıtynda partııaǵa kirýge ótinish qaldyrdy. Tek úgit-nasıhat kezeńinde partııaǵa kirgenderdiń sany 53000-nan 311000-nan astam adamǵa deıin ósti.
Máselelerdi sheshý úshin ortalyq apparat pen partııanyń 202 óńirlik fılıaly jumys isteıtin bolady.