«Adal kómek» jobasy 18 myń adamǵa qol ushyn sozdy

NUR-SULTAN. QazAqparat – «Adal kómek» jobasy aıasynda 18 myń adamǵa kómek kórsetildi. Bul týraly joba jetekshisi Aıman Ýmarova aıtyp berdi, dep habarlaıdy QazAqparat tilshisi.

«Bizdiń joba bastapqyda áleýmettik osal toptarǵa arnalǵan edi. Biraq bizdiń jobaǵa tek qana osal toptar emes, ártúrli adamdar habarlasyp, keńes alyp jatyr. Túpki negizgi maqsatymyz – osal toptarǵa kómektesý. Biraq meniń túsiginimshe, zańda osal dep tanylǵan tulǵalarǵa ǵana emes, qıyn jaǵdaıǵa tap bolǵan barlyq adamǵa kómek berilýi qajet», - dedi Aıman Ýmarova Sybaılas jemqorlyqqa qarsy qyzmet agenttigi uıymdastyrǵan onlaın suhbatta.

Onyń aıtýynsha,18 myńnan astam adam «Adal kómek» jobasyna júgingen. Keıbiri telefon arqyly habarlasyp konsýltatsııa alyp jatyr.

Sonymen birge, joba jetekshisi aldaǵy ýaqytta uıymdastyrylatyn jobalar týraly aıtyp berdi.

«Adal kómek» aıasynda shet elderden kelip jatqan otandastarymyzǵa kómek kórsetetin arnaıy joba jasalady. Mundaǵy eń basty másele – kóship-qoný jáne adamdarǵa qujattar alý boıynsha konsýltatsııa kórsetiledi. Sonymen birge balalarǵa jáne túrmedegi tutqyndarǵa kómek kórsetetin jobalardy da qolǵa aldyq», - dedi A. Ýmarova.

Aıta keteıik, Aıman Ýmarova – QR Prezıdenti janyndaǵy ulttyq qoǵamdyq senim keńesiniń múshesi jáne respýblıkaǵa tanymal advokat.