Adal kásipkerlerdiń alańdaýyna esh negiz joq – Álıhan Smaıylov

<p>QR Premer-Mınıstri Álıhan Smaıylov &laquo;24KZ&raquo; telearnasyna bergen suhbatynda 2024 jyly bıznesti tekserýge moratorıı alynyp tastalǵannan keıin qazaqstandyq kásipkerlerdi ne kútip turǵany týraly aıtty, dep habarlaıdy <a href="https://kaz.inform.kz/news/shko-turgini-separatizm-ushn-5-zhilga-sottaldi-34bbb8/Kazinform" target="_blank" rel="noopener">Kazinform</a>.</p>

Úkimet basshysy shaǵyn jáne orta bıznes kez kelgen eldiń ekonomıkasy men turaqtylyǵynyń negizi ekenin atap ótti. Sondyqtan memleket qolaıly bıznes-ortany qurýǵa úlken mán berip otyr.

«Biz bıznes qaýymdastyqpen birlesip, kásipkerliktiń damýyna kedergi keltiretin shekten tys talaptardy anyqtaý boıynsha úlken jumys atqardyq. Nátıjesinde 10 myńnan astam negizsiz talapty anyqtadyq. Búginde onyń 9 myńynyń kúshi joıyldy. Qalǵany keler jyldyń basynda Parlamentte tıisti zań qabyldanǵannan keıin alynyp tastalady», — dedi Álıhan Smaıylov.

Onyń aıtýynsha, táýekelderdi basqarý júıelerin avtomattandyrý boıynsha da jumystar júrgizildi. Bul adamı faktordy joıa otyryp, tekserýlerdi josparlaýǵa múmkindik beredi. Nátıjesinde olardyń sany 2 esege qysqarady. Jalpy zańǵa baǵynatyn kásipkerlerge ákimshilik qysym azaıady.

«Osylaısha, moratorıı aıaqtalǵannan keıin elde jappaı tekserýler bolmaýy kerek. Adal kásipkerlerdiń alańdaýyna esh negiz joq», — dedi Premer-Mınıstr.

Ol bıznestiń problemalary mınıstrlikter men Úkimettiń túrli alańdarynda turaqty túrde jan-jaqty talqylanatynyn aıtty. Olardyń kóbi sheshimin tapty.

Úkimet basshysynyń aıtýynsha, shaǵyn jáne orta bıznestiń ekonomıkadaǵy úlesi JІÓ-niń 36,5%-yna deıin ósti. Bıyldyń ózinde munda jumyspen qamtylǵandar sany 500 myńǵa artyp, 4,3 mln adamǵa jetti. Ósý qarqyny shamamen 14% qurady.

«Bul rette bizdiń aldymyzda orta merzimdi perspektıvada ShOB úlesin JІÓ-niń 40%-yna deıin arttyrý mindeti tur. Bul elimizdiń odan ári turaqty damýyna negiz bolady», — dep túıindedi ol.