Adal eńbegimen úlgi bolǵan 2 otbasynyń úlkenderi memlekettik nagradamen marapattalmaq

TALDYQORǴAN. QazAqparat – Elimizde bir salada eńbek etip, mamandyqty tutas áýlettiń kásibine aınaldyrǵan otbasylar az emes. Memleket basshysy Qasym-Jomart Toqaev Jetisý oblysy jurtshylyǵymen kezdesýinde adal eńbegimen úlgi bolǵan 2 otbasynyń úlkenderi memlekettik nagradamen marapattalatynyn aıtty, dep habarlaıdy QazAqparat Aqordaǵa silteme jasap.

«Erteń «Mereıli otbasy» respýblıkalyq baıqaýy óz máresine jetedi. Onda búkil halyqqa ónege bolatyn úlgili otbasylar marapattalady.

Qazaqstanda naqty bir salada eńbek etip, tutas áýlettiń kásibine aınaldyrǵan otbasylar az emes. Men jaqynda teledıdardan Ulytaýda turatyn Áıtenovter otbasy týraly baǵdarlama kórdim. 9 balasy, 36 nemeresi, 70 shóberesi, 3 shópshegi bar shańyraq, shyn máninde elge úlgi-ónege bolýǵa laıyq. Soǵystan keıin mys qorytatyn zaýytta eńbek etken Jaquda marqumnyń urpaqtary áke jolyn qýyp, osy mamandyqty tańdaǵan. Bul áýlettiń metallýrgııa salasyndaǵy jalpy eńbek ótili – 442 jyl. Muny naǵyz adal eńbek deýge bolady. Qazir shańyraqtyń ata kásibin 10 nemeresi jalǵastyryp keledi.

Jetisýlyq Andastar áýletin de naǵyz mereıli otbasy deýge bolady. Arǵy babalarynan mıras bolǵan 700-den astam jádigerdi saqtap otyrǵan shańyraqty kádimgi murajaı desek te artyq emes. Áýlettiń anasy – óńirge tanymal etnograf, belgili qolóner sheberi. Olardyń urpaqtary da ata-anasynyń jolyn jalǵap, ǵylym jolyn tańdaǵan.

Men osy eki otbasynyń úlkenderin joǵary memlekettik nagradamen marapattaý týraly sheshim qabyldadym», - dedi Prezıdent.